Gikan sa 1917 hangtud sa 1991 ang dakong isyu mao ang komunismo.
Gikan sa 1991 hangtud karon ang dakong isyu mao ang materyalismo.
Akong ipaila-ila ang ID ni Materyalismo
Ang Dios ni Materyalismo mao ang kuwarta
Ang iyang relihiyon mao ang ginansiya
Ang iyang simbahan mao ang bangko
Ang iyang altar mao ang telebisyon
Ang iyang wali mao ang konsumerismo
Ang iyang lulinghayaw mao ang turismo
Ang iyang kaluwasan mao ang insurance
Ang iyang lubnganan mao ang Memorial Park
Sa tanang mga ismo si materyalismo mao ang peligro
Kay mosulod siya sa imong ulo
Pinaagi sa daghan kaayong mga promo.
Dili dautan ang mangandam alang sa kaugmaon. Apan ang nakadaot lang kay daghan sa mga tawo ang nihimo usab sa mga materyal nga butang ingon nga mga seguridad nga hulip sa dapit sa Dios. Nakalimtan nila ang Diosnong Probidensiya nga ang Dios wala lang manghinan-aw kanato. Daghan kita og gipangayo nga giisip natong panginahanglan apan kun tukion nato, mga bunga lang diay sa kapritso. Sama sa sugilanon nga ang tawo ang ni-risgo gayud bisan kun kuyaw kay nagtuo man siya nga ang kinabuhi usa ka dakong taghap. Ang wala lang niya hisayri nga ang Dios nasayud nang daan sa iyang gikinahanglan bisan wala pa niya kini litoka.