EDITORYAL - Ang mangingilad sa Cebu

Kining ka dimalas sa tawo di gyud matag-an, apan kun ang matag usa maminaw pa lang unta sa mga sibya sa radio sa Sugbo o mobasa og pamantalaan, di gyud unta madisgrasya sa mga mangingilad nga anaa magyampungad sa mga pantalan, terminal , aseras o bisan asa dinhi sa dakbayan sa Sugbo.

Kini tungod kay matag karon ug unya gisibya kanunay sa taga radio ang pasidaan publiko bahin sa daghang mangingilad dinhi sa dakbayan.

Usa sa gipasidaan kanunay sa taga radyo , mao ang pagsanta sa katawhan sa paglikay pagpakigsuod sa di ninyo kaila, kay kasagarang dali kaayo kaninyong moduol ug makighigala , mao ang mga mangingilad.

Nanggungis na ang ubang mga mangingilad dinhi, ang uban hagbay rang nakalabira gumikan kay namatay sa gaba, pero wa gyud hingpit nga nasilhig sa kapolisan ang mga kaliwat sa mga mangingilad.

Naay mga retrato sa buhatan sa kapolisan, apan igo rang ipakita sa mabiktima kun adunay gustong moila sa dagway sa mibiktima kaniya.

Ang mangingilad way giilang tawo, ma- otoridad ka man, adunahan , o kabus. Basta ang dagway nimo ilaronon, anha gyud ka abti og dimalas sa ilang mga kamot.

Mao kini nahitabo niadtong usa ka sundawo nga nailad sa usa ka mangingilad, ug gani gilakip pa unta pagkawat ang iyang anak kun wa pay laing butang kawatunon nga sayon ra niya dad-on.

Ang maong mangingilad nakighigala sa sundawo nga mao pay pagdunggo sa pier gikan sa Mindanao, kay anhi mosakay og barko paingon sa Manila.

Sa laktod dihang nasuta sa mangingilad nga ilarunon ang dagway ug kinaiya sa maong sundawo, miibid-ibid kini kaniya hangtod nga dihang nakakita og higayon, gidala ang iyang mga butang sama sa bag nga didto ang iyang armas ug laptop , ug kuwarta kauban sa iyang anak.

Dihang nakahunahuna ang mangingilad nga hasol na kaayo kun hingpiton pa niya pagkawat ang bata, gibilin nalang kini sa usa ka kan-anan sa dalan Colon ning dakbayan sa Sugbo.

Sa mga taga radio hapit matag adlaw ising-al sa mga magsisibya ang pagpahibawo sa tanan nga di mo makigsandurot sa mga tawong di ninyo kaila kun nia na kamo sa dakbayan sa Sugbo.

Busa kun nabiktima ang usa ka sundawo, kinsa kahay sunod nga mabiktima. Di   ba?