Tulo na ka nasud ang nakatilaw sa kaisog sa kagamhanan sa Pilipinas, una ang Hong Kong dihang gipamatay sa usa sa mga otoridad sa kagamhanang Pinoy ang mga turistang taga Hong Kong.
Ikaduha, wa man hinuon pamatya , apan didto ihatod sa kagamhanan sa Pilipinas ang mga Taiwanese nga may kaso, sa China ang higpit nga kaaway sa taga Taiwan.
Ikatulo ang Norway, kansang lungsoranon niini gipriso sa pasangil nga nanagit ug mipatay og bata.
Ika-upat , aw wa pa tingale, apan ambot kinsa kahay sunod nga witkan sa mga Pinoy sa ngilngig niining kinaiya, ma-legal man o illegal.
Apan kining tanan nag-agad sa dagan sa mga hunahuna sa mga tawo o mga otoridad nga nagpadagan sa rinda sa kagamhanan.
Ang kagamhanan sa Hong Kong murag napuypoy lang dayon sa ilang kasuko batok sa kagamhanan sa Pilipinas, dihang gipasabot sa naulahi nga ang tanan pagbuot sa kahitas-an.
Ang Taiwan, murag mipakita sa ilang naghinobrang kayugot ug kalagot batok sa kagamhanan sa Pilipinas, ug wa pa hisayri kun kanus-a kaha kini mapuypoy.
Maayo lang unta kun mahisama kini sa taga Hong Kong nga , human pasabta, aw nakapasaylo lang dayon sa dakong lapso nga nahimo sa kagamhanan sa Pilipinas , human mamatay ang walo ka lungsoranong taga Hong Kong.
Ang Norway, aw wa pa usab hisayri kun unsay kolor sa kasuko niining ipakita batok sa mga Pilipino.
Ang pait kay mao ra man og ilakip sa kagamhanan sa Taiwan sa ilang kalagot sa Pilipinas ang nanarbaho nga mga OFW nga Pinoy nga tua sa ilang nasud.
Kun pasipad-an nila ang mga OFW didto, pagka-makaluluoy intawon sa mga inosente kaayong mga kabus nga mga Pinoy, nga nanginabuhi didto ug mapagan lang sa di nimo hisabtang lakang sa Malacanang pagpalagot sa taga Taiwan . Di ba?