Hilaw nga hustisya

Makaluluoy kaayo ang Norwegian national nga natanggong sulod na sa pipila ka semana tungod sa nagpadayong imbestigasyon sa kamatayon sa 6-anyos nga si Ellah Joy Pique.

Samot ang iyang pagkamakaluluoy kun sa kaulahian, mapamatud-an sa mga imbestigador nga siya ug ang iyang pangasaw-onon nga si Karen Esdrelon wala gyuy kasayuran sa kamatayon ni Ellah Joy.

Apan ang labaw’ng makaluluoy niini mao si Ellah Joy mismo ug ang iyang pamilya. Kini kun hingpit na nga naka-eskapo ang mga tinuoray nga mga kriminal tungod sa kaburingog sa mga polis sa Cebu Provincial Police Office (CPPO).

Pinaagi lang sa komedya, na-hold si Sven Erik Berger ug si Karen sa immigration booth sa dihang paingon na unta silang manglarga sa Hong Kong.

Pagpresentar nila sa ilang passport, si Karen nangomedya sa iyang pamanhonon nga Norwegian “It looks like you!” dungan ang pagtudlo sa winiris-wiris nga cartographic sketch nga gipapilit sa bongbong.

Ang yabag nga immigration officer, mituo usab. Iyang gipaduol ang passport ni Berger sa cartographic sketch. Unya nanawag dayon og polis.

Na-hold si Berger. Duha ka adlaw ang nakalabay, si CPPO director Erson Digal mideklarar nga silang duha si Berger ug si Karen “formally arrested” na, wala na lang gyud magkuha og warrant of arrest aron mahimong legal ang ilang pag-aresto sa manag-uyab.

Sa dihang nagkahilis ang mga ebidensiya batok nilang Berger ug Karen, mikalit lang og kawala si Digal. Samot na nga ang National Bureau of Investigation (NBI-7) mi-apil sa imbestigasyon, aron masusi ang mga “alibi” sa mag-uyab nga wala nalang gyud hatagi og gamay‘ng importansiya ni Digal ug sa iyang mga sakop.

Niadtong miaging semana, atol sa among programa nga Clear-Cut Tonight sa CCTN-INTV Channel 47 uban ni Manny Rabacal ug Godo Roperos, nakapahimangno kita sa mga polis sa pagtarong sa imbestigasyon.

Tinuod nga adunay mga bata nga mitudlo kang Karen nga maoy ilang nakit-an ug nailhan nga babaye nga kuyog sa usa ka “puti nga daghan og patik” nga mipik-ap kang Ellah Joy sa barangay Calajo-an sa Minglanilla.

Apan duha na ka lungag sa pagpunay og panudlo sa mga bata nga angay untang susihon sa mga imbestigador sa CPPO. Una, miingon sila nga ang “puti” adunay daghang patik. Duna bay patik si Berger?

Ang gisakyan sa lalaking “Amerkanohon” ug sa babaye Pajero o mura’g Pajero.

Pero nakapresentar na og ebidensiya silang Berger ug Karen nga Toyota Vios ang ilang gi-abangan ug dili Pajero.

Nganong wala man pangita-a sa mga polis ang Pajero? Mao unta kadto ang makatabang nila aron mailhan ang mga kriminal.

Dili ko mo-conclude karon dayon nga walay sala silang Berger ug Karen.

Apan balikon nako ang pag-awhag sa kapolisan nga palihog, taronga intawon na ang dinad-an sa imbestigasyon sa pagkamatay ni Ellah Joy.

Kay kun mahitabo nga dili si Berger ug si Karen ang tinuod nga kriminal, kita dinhi sa Pilipinas, ilabi na sa Cebu, ang maulawan sa international community.

Human na ra ba kita ma-ulawi sa dihang napalpak ang dinad-an sa mga SWAT sa Manila sa hostage taking sa Quirino Grandstand nga gikamatay sa daghang mga turista gikan sa Hong Kong.

Sa kaso ni Berger, ang “investigative capability” sa atong Philippine National Police (PNP) ang mabutang sa alanganin kun dili tarongon ang pag-imbestigar sa kidnapping ug murder ni Ellah Joy.

Simbako og wala nay manganhi nga mga turista sa ato o wala nay mga langyaw nga negosyante ang manganhi sa kahadlok nga ma-akusahan sila og krimen nga wala nila himo-a kun moanhi sila sa Pilipinas, ilabi na sa Cebu. Kuyaw kaayo.

Kinsa man ang mabasol niini? Dili ba ang kapulpol sa kapolisan?

Ang dakong sayop sa task force nga gi-umol ni Digal aron maoy mosusi sa kamatayon sa bata, sa dihang nakit-an ang manag-uyab nga si Berger ug si Karen, nanghunong na sila sa pag-imbestigar sa ubang posibilidad gawas nianang duha.

Pananglit og tinuod ang gipanulti nilang Berger ug Karen, unsaon naman lang to ang tinuod nga mga kriminal kun naka-ikyas na? Nagkatawa na lang sila sa ka-tadyaw sa mga polis sa Sugbo.

Dili pa hinuon ulahi ang tanan.

Akong awhag sa pamilyang Pique sa Calajo-an, Minglanilla, pugsa ninyo ang kapolisan sa pagsuhid sa tanang anggulo. Ayaw kamo og sugot kun hatagan lamang kamo sa kapolisan og “hilaw nga hustisya” sa kamatayon ni Ellah Joy.

Pangayo-a ninyo ang tinuod nga hustiya, pukpoka kanunay ang kapolisan nga motrabaho sumala sa gimbut-an sa ilang tahas.

* * *

Ang Delta Gamma Beta Fraternity and Sorority magsaulog sa ilang Golden (50th) Anniversary karong Sabado, Prebrero 26. Aduna sila’y ipahigayong panagtapoktapok sa samang adlaw, sa alas 6 sa hapon sa ZAO Grill Restaurant sa dalan Andres Abellana, barangay Guadalupe ning siyudad.

Alang sa dugang kasayuran, mahimo kamong motawag sa vice chairman nga si Arnold Dave Estremos sa telepono 0909-7212-3368.

Mga sakop sa maong fraternity, higayon na ninyo kini nga maghimamatay og balik sa inyong mga kaubanan, busa tambongi kining inyong Golden Anniversary. Dili na unya kamo makatambong sa sunod ninyong golden anniversary nga mahitabo 50 ka tuig pa sukad karon. Hehehe.

Cheers!