EDITORYAL - Ang kamatayon ni Reyes

Kinsa ba gyuy basulon sa kamatayon ni Heneral Angelo Reyes? Mibusagak kining pangutanaha kay daghang miingon nga ang mga senador nga nagpunay og kulitog sa mga kinawatay sa kuwarta sa gobyerno maoy angayang basulon sa kamatayon ni Reyes.

Naa say miingon nga ang korapsyon maoy nakapatay kang Reyes. Ang uban miingon nga sad-an gyud si Reyes maoy hinungdan nga nagpakamatay, ug daghan ang nagkalainlaing mga komentaryo sa kamatayon ni Reyes.

Taym pa kun ang korte pay naghusay sa kaso ni Reyes, di pa tingale unta siya mamatay, basin ingon niini ang hunahuna sa uban. O kaha wala nalang unta ibutyag ang giingong minilyon ka pesos nga iyang nadawat gikan sa welcome gift, cash gift ug pabaon gift, o kaha wala nalang gyud untay gihimong imbistigasyon ang mga opisyal sa gobyerno aron di pa unta mamatay si Reyes.

O kaanindot unta kaha sa maong imbistigasyon nga maoy magsilbing dalan aron malimpyo ang iyang dungog gikan sa mga dautang pasangil, ilabi na kun inigbarog niya atubangan sa mga magbabalaod, taas kaayo ang iyang agtang sa pagpanghimakak sa maong mga pasangil kay limpyo ang iyang konsensya sa pagpatigbabaw nga wala gayud siyay nakawkaw nga salapi sa gobyerno.

Apan anugon nganong wala niya ipabarog ang tinuod nga wala gayud siyay sala nga nahimo ug ipabati niya sa tibuok kalibotan ang kalimpyo sa iyang mga kamot sukwahi sa gipatuo sa namasangil kaniya.

Nganong wa man ni niya buhata? Ngano man?.. ug hinuon naghikog man siya. Ngano man?   Di ba?