Gitudlo nga sa relihiyon dili gyud mawala kining tulo ka C’s: Creed, Code, ug Cult. Ang Creed mao ang sukaranan sa pagtuo, ang Code ang nakasentro sa balaod ug ang Cult ang nagpadayag sa kinabuhi sa pagsimba sa katawhan nga naglambigit sa maong relihiyon. Mao nga atong pamalandongan ning Domingoha ang Code kun ang balaod.
Si Jesu-Cristo ingon nga usa ka Judio usa ka tawo nga matarong. Kun maghisgot kita og matarong, nagpasabot kini nga usa usab ka tawo nga masinugtanon. Unsay gisugot ug gituman? Ang Balaod sa Katigulangan. Mao nga gitataw pag-ayo sa Ginoo nga wala siya moanhi aron pagwagtang sa balaod sa ilang katigulangan. Hinunoa, mianhi siya aron hatagan sa hustong interpretasyon ang balaod. Nga sa ato pa, ang balaod ang angayan lamang nga hubaron sa paagi nga magdala og kaluwasan sa tawo ug dili kalaglagan niya. Ang mga Pariseo ug ang mga magtutudlo sa balaod ang kutob ra sa literal nga paghubad niini apan ang ilang pagkinabuhi ang nahimong dakong supak sa kahulogan niini. Ang balaod sa Dios kun sumadahon nato ang nagpunting sa balaod sa gugma nga gibahin sa mga magtutudlo sa balaod ngadto sa 613 ka mga lain pang mga balaodnon.
Tudloi ang imong kaugalingon nga dili ka mamahimong “suplado” sa walay igong rason o hinungdan. Kat-oni ang pagkamasinugtanon sa balaod aron dunay han-ay ang tanan. Apan paningkamoti usab nga hatagan mo og mas makahuloganon nga paghubad ang balaod nga imong gisunod..dugang pa, himoa usab nga makamao kang mamalandong sa balaod ug sa iyang kahulogan. Kay matud pa sa panultihon: “Ignorance of the Law Excuses no one!”