Asin ug kahayag

Ang awit Asin ug Kahayag maoy mosumada sa kahulogan sa Ebanghelyo nato karong Domingoha. Ingon nga Asin ang Kristohanon ang naghatag og kalami sa kalibutan ug sa isigkaingon. Ingon nga Kahayag ang Kristohanon mao ang naghatag og giya sa iyang isigkaingon. Mahitabo lamang kini pinaagi sa pagpakita og maayong sanglitanan ngadto sa uban. Ang maayong panig-ingnan maoy makapahimo sa usa ka tawo nga usa ka bililhong hiyas alang sa iyang kaigsuonan.

Paningkamoti nga makahatag ikaw og kalipay sa imong isigkaingon karong adlawa. Kay matud pa ning maong sugilanon:

Ang iyang gipaambit

Usa ka pari ang mipaambit nga iyang nahimamat ang usa ka pilantropo nga madasigon kaayo diha sa pagtabang sa uban nga nanginahanglan. Ang maong tawo igo lang miingon ngadto kang Padre: “Gipanalanginan man ako sa Dios, mao nga naningkamot usab ako nga mamahimong panalangin alang sa uban!”