Bag-ong KBP Cebu

Niasumir nang bag-ong liderato sa Kapisanan ng mga Brodkaster ng Pilipinas (KBP) Cebu Chapter pagpangu sa mga magsisibya pag-atubang sa bag-ong mga hagit sa industriya. Si Atty. Ruphil Bañoc, station manager sa DYHP, napiling bag-ong tsirman. Gipulihan niya si Carlo Dugaduga nga natudlong public information officer sa Cebu City government.

Abagan siya sa executive vice chairman nga si Marlon Baula, sa Hot FM ug Yes FM, kinsa magsilbi sang Standards Authority (SA) officer. Napili sang vice chairman sa AM Radio si Jun Tagalog sa DYLA; vice chairperson sa TV si Yoli Gendrauli sa TV5; ug vice chairperson sa FM Radio si Soi-I Hernandez sa Energy FM. Nanumpa sila atubangan ni Atty. Cynthia Barte, KBP Cebu Legal Counsel.

* * *

Atol sa General Membership Meeting sa KBP Cebu Chapter gahapon sa hapon, nisaad si Bañoc pagpalambo sa kaligdong sa industriya aron mas mapalig-on pa ang pagsalig ug pagtahud sa nagkalainlaing sektor sa katilingban. Matod ni Bañoc makab-ot ni kun padayon nga magkahiusa ang mga magsisibya sa pagtinabangay pagpalapad sa ilang katakos.

Gihangop ni Bañoc ang pasalig sa ubang napili nga mga opisyal sa iyang pamunoan sa aktibong pagtabang sa nagkalainlaing kalihokan nga pasiugdahan sa KBP Cebu Chapter karong tuiga. Gihangyo sab ni Bañoc silang Dugaduga, Barte ug ubang nangagi nga mga tagduma sa KBP sa paggiya niya.

* * *

Gipasidunggan sa KBP Cebu Chapter si Dugaduga sa iyang panamilit ug pormal nga pagtapos sa iyang duha ka tuig nga termino. Usa sa labing dagko niyang nahimo mao ang pagpasiugda sa tinuig nga Broadcasters Congress. Nga nidapit sa labing dagkong mga opisyal sa gobyerno ug pribadong sektor nga direktang nahilambigit sa industriya sa pagpanibya.

Sa mga kongreso sa niaging duha ka sunudsunod nga tuig, gawasnon nga gituki sa mga magsisibya ang labing mahinungdanon ug dinalian nga mga isyu sa ilang panrabaho. Nipasar sab sila og mga resolusyon pagpaluyo sa mga balaudnon nga mopatigbabaw, ug pagsupak sa mga sugyot nga molugpit, sa kagawasan sa pagpanibya.

* * *

Ubang napili nga mga opisyal sa KBP Cebu Chapter karong tuiga: Cherry Ilaw sa DYAR isip secretary; Arnie Delfin sa Bombo Radyo isip auditor; Victor Toledo sa NU 107 isip press relations officer; ug Brooke Fortich sa DYRB ug Ayie Lanza sa Love Radio isip mga sakop sa board of directors.

Ubos sa liderato ni Bañoc, may sukaranan ang pagsalig nga mas molambo pang KBP Cebu Chapter. Nga sud na sa daghang katuigan, labi na atol sa tulo ka sunudsunod nga tuig sa pamunoan ni Chairman Edward Abad, gipasidunggan isip labing maayong chapter sa tibuok Pilipinas. Hinaot nga magpadayon ang bag-ong pamunoan pag-alagad di lang sa mga magsisibya kun dili, ug labi na, sa mas nagkinahanglan nga mga sakop sa katilingban.

* * *

Email: [email protected]