Pangabugar ni Gutierrez

Pila may “acceptance fee” nga nadawat ni Ombudsman Merceditas Gutierrez gikan ni kanhi AFP comptroller Carlos Garcia aron depensahan ang pagpakig-areglo niini sa kasong plunder nga iyang giatubang?

Labaw pa man hinuon si Gutierrez sa abogado ni Garcia tungod kay kuwang naman lang niini nga moingon nga inosente ang akusado sa kasong pagpangawkaw nga iya karong giatubang didto sa Sandiganbayan.

Atol sa iyang pag-atubang didto sa imbistigasyon sa Kongreso maylabot sa pagsulod ni Garcia ug sa mga prosecutors sa Ombudsman og “plea bargaining agreement” gibalik-balik ni Gutierrez pag-ingon nga huyang ang ilang ebidensiya batok sa akusado.

Kini maoy hinungdan nga misugot sila sa plea bargaining diin moangkon si Garcia sa mas minus nga kaso ug i-uli ang kapin sa sien milyones pesos nga kabahin sa sobra sa 300 milyones nga pundo nga iyang gikawat gikan sa panudlanan sa AFP.

Apan taliwa sa pangugat ni Gutierrez nga huyang ang ilang ebidensiya, ang kanhi Ombudsman nga si Simeon Marcelo kinsa maoy misang-at sa kaso batok ni Garcia miingon nga lig-on ang ebidensiya.

Ang pangangkon ni Marcelo mas gipalig-on pa sa pamahayag sa kanhi budget officer sa AFP nga si retired Col. George Rabusa ug sa kanhi COA auditor nga si Heide Mendoza nga nagdetalye unsa ka grabe ang anomaliya sa pundo sa military.

Si Rabusa ug Mendoza mihatag og kinabuhi sa dugay nang pagtahap sa katawhan nga luyo sa antigo nga mga gamit sa kasundalohan, busloton nga mga sapatos ug pus-aw nga mga uniporme lakip na sa dyutay nga sweldo, nagpahipi ang grabing pagpangawkaw sa pundo sa militar.

Matud ni Rabusa nga gatusan ka milyon ka pisos ang gikuha gikan sa sweldo sa mga sundawo aron ihatag isip pabawon sa mga miretiro nga mga hepe sa AFP ingon man usab isip regalo sa mga bag-ong molingkod nga mga chief of staff.

Wala pa ni labot sa mga gikawkaw sa maong mga opisyal atol sa ilang pangatungdanan. Ang grabing kawat sa pundo sa militar nakompirmar sa pakisusi sa COA pinaagi sa grupo nga gipangulohan ni Mendoza.

Matud ni Mendoza nga basi sa ilang pakisusi gatusan ka milyon ka pisos ang pundo nga nahanaw ang uban niini gikan pa sa United Nations. Matud pa nga ang pagpakanaw sa maong pundo tungod kay gihatag ni sa mga opisyal sa militar. Isip comptroller si Garcia maoy naghupot sa pundo sa AFP.

Apan luyo niining kutay sa mga pamahayag ug ebidensiya lupig pay kabayo sa Duljo nga gitaptapan ang mga mata si Gutierrez nga wala makakita niini.

Akong huwaman ang pulong ni Gutierrez atol sa iyang pagtambong sa imbistigasyon sa Kongreso diin matud pa niya nga kun duna may nakasapi sa pagsulod ni Garcia ug plea bargaining agreement hinaot unta nga maigo sa kilat.

Ug hinaut nga ang unang maigo mao ang lider sa ahensiya nga napakyas pagtuman sa tahas niini paggukod sa mga kurakot nga opisyal sa atong gobyerno.

* * *

[email protected]