Lingaw-lingaw batok agrikultura

Sigun sa summary report sa Priority Development Fund (PDF) o pork barrel expenditures sa mga bokal sa tuig 2010 mokabat sa 10.4 milyones ka pesos ang nagamit sa tanang kinse ka mga bokal apil usab ang bise gobernador sa mga gihangyo sa mga kalongsuran sa lalawigan sa Sugbo.

Ang gigastohan sa pork barrel sa mga bokal gibahin kini ngadto sa unom ka klase nga mao ang Community Development Outreach project, Economic Development, Social Services Development, Infrastructure Development, Sports Arts and Culture Development ug Peace and Order.

Ang community Development Outreach project gigahinan kini sa mga bokal og P335,000 nga gilangkoban niining mosunod; kalikupan nga may gahin nga 140 mil ka pesos, edukasyon nga adunay gahin nga 115 mil ka pesos, kooperatiba ug livelihood nga may gahin nga 65 mil ka pesos ug ang agrikultura nga aduna lamay gahin nga 15 mil ka pesos.

Samtang ang Sports, Arts and Culture Development sama sa fiesta gigahinan kini sa mga bokal og 5.73 milyones ka pesos.

Sigun sa atong makita mas dako pa og pundo nga gigahin ang mga bokal ngadto sa mga lingaw-lingaw kay sa atong agrikultura. Ang gobernadora sa iyang mga gipamahayag murag atong masabot nga mas mahinungdanon para kaniya ang mga fiesta o lingaw-lingaw kay sa atong agrikultura. Hala palabiha ninyo nang mga fiesta tan-awon nato og di ba mo mangapasmo kun wa nay mag-uma o mamuhi og kahayopan. Wa seguro mo masayod nga kun walay angrikultura mangapasmo mo sa mga fiesta nga inyo unyang adtoan?

* * *

Gumikan sa baha nga nasinati sa Sugbo nunot sa sunod-sunod nga uwan nakahuna-huna ang buhatan sa Ombudsman sa pagpakigtagbo sa mga local chief executives ug mga nasudnong ahensiya sa gobyerno aron tuki-on ang suliran sa baha. Maayo kay nakahuna-huna ug aduna pay panahon ang Ombudsman Visayas sa pagsulbad sa suliran sa baha. Dili na diay loaded sa ilang trabaho ang mga personahi sa Visayas Ombudsman? Ang mga kaso nga tagpila na ka tuig nga natanggong sa ilang buhatan ila na diay kining naatiman kay mag-apil-apil naman sila sa suliran sa baha nga wala sa ilang experties?

* * *

I wanna be a general pre cz of d million pabaon. hahayyyy, d pabaon of my tatay b4 he dies magbinut-an ra jud, he he he. Reaction kini ni paring Joram Alatraca sa akong lindog kaniadtong Martes. Iya kining gi-txt kanako ug ako usab nga gipaabot diha kaninyo.