Basura sa Kalunasan

Atol sa sagunson nga pagbunok sa uwan sa miaging semana usa sa mga dapit dinhi sa dakbayan nga nakasinati og pagdahili sa yuta mao ang Barangay Kalunasan. Dili na ni bag-o alang sa maong barangay tungod kay sa daghang higayon nasinati na niini ang maong problema.

Salamat nga way kinabuhi nga napildi o ba kaha naangol atol sa hitabo. Naguba gyud hinuon ang koral sa Kalunasan Elementary School tungod sa baha. Dili hinuon problema ang baha sa maong barangay tungod kay anaa man kini mahimutang sa bukirang dapit sa dakbayan.

Apan nabalaka ko nga kun magpadayon ang giingon ilegal nga pagpanguykoy og yuta diha sa maong barangay masinati sa dili madugay dili lang ang pagdahili sa yuta kun dili lakip na ang pagbaha.

Labi pa nga karon nga nagpasad ang mga basura sa karsada tungod sa kapakyas sa mga opisyal sa barangay pagtagad og hakot niini. Ang mga plastic ug uban pang matang sa basura nga posibleng makabara sa agianan sa tubig dili imposible nga ianod sa higayon nga dunay kusog nga uwan tungod kay gipasagdan man lang kini nga anaa daplin sa karsada.

Usa ka semana kapin na nga way trak sa basura gikan sa barangay nga nihakot sa sagbot. Hinungdan nga ang uban nagpataka nalang og labay sa ilang basura.

Gani ang usa ka bakanting luna diha dayon og lugsong paingon sa Langub Shrine gihimo na nga open dumpsite sa mga molupyo. Hugaw kaayo ang maong dapit ug makauuwaw sa mga bisita nga moagi dinhi paingon sa Langub Shrine ug sa Cebu Provincial Detention and Rehabilitation Center aron pagsaksi sa mga pasundayag sa dancing inmates.

Sigurado ko nga nakit-an ni Kapitan Nunilon Monares ug hinaut nga dili siya magpakabuta bungol niini. Huwaton pa ba nimo kapitan nga manimaho ang tibuok barangay?

Kun ang mga molupyo nibabag sa tinguha sa dakbayan kaniadto nga himuong dumpsite ang atong barangay karun atong ipakita nga husto ta sa atong pagbabag niini tungod kay gusto ta nga limpiyo ang atong palibot.

* * *

Ang PAGASA mipahimangno sa posibleng bagyo nga moigo sa Sugbo ugma o ba kaha sa Miyerkules. Si Oscar Tabada atol sa tigum nga gipatawag ni Gobernador Gwen Garcia niadtong Sabado mipasidaan nga magdala og kusog nga uwan ang maong bagyo nga bunyagan og “Amang.”

Busa matud niya nga angayang mangandam ang gobyerno ug ang katawhan sa posibleng kadaut nga ihatud niini labi pa sa mga pagbaha ug landslides.

Gani matud ni Tabada nga bisan kun dili pa kini mahinayon pag-igo sa Sugbo dako gihapon ang posibilidad nga atong masinati ang kusog nga uwan nga maghatud og pagbaha.

Mao nga kinahanglang magbantay ta ug mangandam sa bisan unsa nga katalagman.

* * *

[email protected]