Ilaga naapil sa chorizo

Kining mga tawo, apil na ang mga tag-iya og commercial establishments, nga nakapagamay sa kasapaan daku kaayo og nahimong sala sa katawhan ug sa atong balaud.

Maayong susihon sa kadagkoan sa Department of Public Works and Highways (DPWH) kun ngano nga ang dakung balay-patigayon diha sa Banilad nakapalapad man sa ilang lugar ngadto sa Mahiga Creek.

Si Mayor Michael Rama mismo maoy nakabantay nga ang maong balay patigayon mipalapad sa ilang lugar ngadto sa sapa.

Makita nimo kini sa karaang riprap sa sapa nga tul-id ngadto sa pikas, apan nahimo na nga hiwi kay gipalapad man sa usa ka balay-patigayon ang iyang lugar.

Unya, sa atbang usab dunay mga balay ug usa ka bentahoso kaayo mitukod usab og daw babag nga semento, pwerte ra ba g’yud nga lig-ona paingon sa sapa. Sa laktud, kapin na lang g’yud sa dupa ang nahabilin sa lapad unta kaayo nga sapa.

Kining gitawag og Mahiga Creek mao kini ang sapa nga nagagikan sa Banilad nga molagbas sa sitio Panagdait, barangay Kasambagan, ngadto sa Subangdaku, Mandaue ug ngadto na sa dapit nga sakop sa Mabolo. Tinuod dunay pipila ka balay nga gitukod gayud ibabaw sa sapa diha sa utlanan sa Mandaue ug Mabolo, apan mas bentaha pa kadto kay wala man nila gihimong gamay ang sapa.

Kuyaw g’yud hinoon alang kanila kun may baha apan wala nila pagamyi ang sapa. Ang grabe ug angayang silotan mao kadtong mga mihimo og riprap sa sapa aron matukod ang ilang balay.

Awhagon nako si Mandaue Mayor Jonas Cortes nga aksyonan niya kining binuang sa ubay-ubay niya nga mga lumulopyo nga sakop sa iyang dakbayan.

Husto si Rama nga kun ang dakbayan sa Sugbo ra ang mohimo’g lakang batok sa mga illegal construction diha sa daplin ug sa ibabaw sa sapa mismo, wala sila’y mahimo.

Ang tinuod malooy kita nga maghuna-huna kun panggub-on ang kabalayan niining mga tawhana kay kun duna pa sila’y yuta nga katukoran sa ilang balay dinhi sa dakbayan dili kini sila morisgo sa ilang kinabuhi diha.

Apan kay ang ilang gihimo makapaapiki man sa uban, wala kita’y mahimo gawas sa pagpiyong sa atong mga mata aron hingpit nga ipatuman ang balaud.

Kun duna nay hukom kabahin niini, lauman nako nga kining mga politiko nga ang gilantaw mao ra ang ilang kaugalingong interes, mohiklin unta sa ilang kahakog ug maoy tan-awon ang kaayohan sa kadaghanan.

Tan-awa og unsay nahitabo niadtong Lunes nga miawas ang Mahiga Creek dili ba pwerteng daghana nga nasakripisyo?

* * *

Motoo ko nga ang ubang gibaligya nga chorizo diha sa atong mga merkado publiko, mga hugaw.

Gawas nga kini mga ransyo na nga karne ang gipanghimo, dunay mga trabahante nga nanghimo og chorizo nga wala magtarung ug wala nila huna-hunaa ang kalimpyo sa ilang gitrabaho.

Dihang didto pa ko nagpuyo sa Lorega, nakakaon g’yud ko og chorizo nga may karne sa ilaga. Human nako mautlob ang katunga, nakita nako ang nipis kaayo nga panit, may balhibo nga pino kaayo. Dugay ko nga naghuna-huna. Dili man g’yud sa baboy ang maong panit ug balhibo? Sus, sa ilaga diay. Bana-bana nako wala kadto tuyoa apan tingali may ilaga nga nangaon og subra nga karne sa galingan.

Gidakdakan lang tingali dayon sa mga karne nga galingonon, natabonan ang ilaga. Pagtuyok, aw unsa pa, naapil og galing ang ilaga ipon sa karne nga para himoong chorizo.

Gikan niadto dili na ko mopalit og chorizo.