Kagawon nga karne

Magmagahi ba gihapon si City Veterinarian Alice Utlang pag-angkon nga dunay mga karne nga gibaligya sa atong kamerkadohan labi pa diha sa Carbon Market ang dili gyud haum kan-on sa tawo tungod sa kontaminasyon sa kagaw karon nga mismong ang Department of Science and Technology na ang mipagawas og findings nga dunay mga chorizo nga gibaligya sa atong mga merkado ang dunay kagaw?

Sa wala pa mogawas ang findings sa DOST pinaagi ni Agham Partylist Rep. Angelo Palmones diha nay laboratory result nga gipagawas ang mga meat importers ug traders nagpakita nga kontaminado sa kagaw ang mga karne labi pa ang local nga mga karne nga gibaligya sa merkado sa Carbon ug Mandaue.

Apan inay nga dawaton ang findings ug mohimo og mga lakang aron kaprotehian ang publiko gikan sa mga kagawon nga karne nga gibaligya sa kamerkadohan giakusahan hinuon ni Utlang ang nagpagawas sa report nga bias ug bakakon.

Tugotan ta sa way pag-uyon nga bias ang gipagawas nga laboratory result, apan tungod kay seryoso kaayo ang maong alegasyon nga nakabutang sa peligro sa panglawas sa mga konsumidor, dili ba mas haum niyang gibuhat inay nga isalikway deritso ang report sa way pagsusi, ang pagpahigayon og iyang kaugalingon nga imbistigasyon?

Apan nganong lahi man ang pagdawat ni Utlang sa report? Duna ba siyay interest sa mga local nga tigbaligya og karne nga giprotehian? O gisugo siya og opisyal kang kansang negosyo sa hog raising nahulga tungod sa pagkatap sa imported nga mga karne sa kamerkadohan?

Makapaduda man gud ang lihok ni Utlang. Kinsa ba gyuy inyang giprotehian, ang mga konsumidor o ang mga negosyante og local nga karne?

Inay nga isalikway niya deritso ang laboratory findings mas katuohan ang iyang pangangkon nga bakak ang maong resulta kun duna siyay gipakita nga kaugalingon niyang pakisusi. Karon ang pangutana duna ba?

Matud niya nga ang ahensiya nga gitugotan lang mohimo og laboratory test mao ang National Meat Inspection Service, apan nganong iya man kunong gipugngan ang mga sakop sa NMIS nga buot untang mokuha og samples sa karne didto sa Carbon Market niadtong Martes ug Miyerkules?

Nganong supak man kuno si Utlang nga karong semanaha himuon sa NMIS ang testing? Nganong magbuot man siya nga sa sunod semana na himoon ang testing? Nganong manglimpiyo usa siya sa Carbon aron masiguro nga wa nay bacterial contamination ang samples nga makuha?

Dr. Utlang maayo tingali nga sa labing dali nga panahon susihon nato ang mga karne diha sa atong kamerkadohan samtang wa pay dautang mga panghitabo. Seryoso kaayo ang maong isyu nga dili mamahimong unya-unyaon tungod kay panglawas sa publiko ang nakataya dinhi.

* * *

[email protected]