Gisaway ni opposition Senator Joker Arroyo ang kagamhanan ni Pangulong Noynoy Aquino tungod kay wa kini klaro nga patakaran mahitungod sa kurapsyon. Iya usab nga gisaway ang plea bargaining agreement tali sa Ombudsman ug kanhi AFP comptroler Major General Carlos F. Garcia diin gihimo na lamang bribery ug money laundering ang kasong plunder niini nga giatubang. Buot ipasabot sa senador nga karon lang kini mahitabo sa administrasyon ni Pinoy.
Maayo kay mitingog na si Joker Arroyo mahitungod sa kurapsyon. Nahilum man ugod ni siya panahon sa administrasyon ni pangulong Arroyo. Concerned na diay karon si Senador Joker Arroyo sa korapsyon. Seguro tungod kay di na niya amo ug wa makatampo sa iyang pagkapili ang naglingkod karon sa Malakanyang maong misugod na usab siya sa pagsaba-saba.
Sa ka baga ug ka lapad sa korapsyon nga nahimo sa administrasyong Gloria Macapagal Arroyo nganong wa man maggunok si Senador Joker Arroyo? Tungod ba kay pariha sila og apilyedo sa pangulo sa nasud kaniadto o tungod ba kaha kay minilyon ang natampo sa pundo sa iyang pagpangampanya pagka senador si unang ginoo Mike Arroyo? Sa iyang pagpakabana sa kurapsyon karon, wa lang kaha ni magkomedya si Senador Joker Arroyo?
Ang plea bargaining nga gisudlan sa Ombudsman ug akusado nga si Major General Carlos F. Garcia ipasa ba upod sa senador ngadto sa Aquino administration? Basin nalimot ang senador nga ang iyang amo ang nagbutang ni Merceditas Gutierez isip Ombudsman ug mao gani kini ang hinungdan kun nganong giyak-an lang ang daghang kasong korapsyon nga gipasaka batok sa adminstrasyong Arroyo. Ayaw ugod pagkomedya diha Mr. Senador!
* * *
Kagahapong adlawa gisugdan na ang pagpatuman sa bag-ong pletihan sa mga taxi sa tibook nasud diin sa pagtikang pa lamang nimo sa taxi nga imong sakyan 40 pesos dayon ang imong mabayran ug tag 3.50 pesos sa matag 300 ka metros nga pagdagan. Hinoon ang kadto lang mga taxi nga makapagawas og resibo sa ilang meter ang gitugotan sa pagsingil sa umento sa pletihan.
Ning bag-ong pletihan sa mga taxi maharohay na kaha ang kahimtang sa mga taxi drivers? Modako-dako na kaha ang ilang kita o ang kita lang sa mga operators o modako? Mao ni ang atong atngan.