EDITORYAL - Ang karneng kagawon

Mas maayo bayang klarohon ug hatagan og emphasis sa mga eksperto sa karne ang giingong ang karne nga maladlad sa lamesa sa merkado sulod sa upat ka oras mapuno na sa bacteria o kagaw nga peligro sa lawas sa tawo.

Kun tinuod kini nganong wala man kaayo nila ipahibawo pag-ayo sa publiko nga daghan man kaayong way kalibotan niini. Malagmit may mga negosyante usab og karne nga wa masayud niini, ug kun nahibawo man, aw wa lang usab magsaba aron nga bisan nabulit na sa kagaw ang ilang karne, mahalin lang gihapon.

Kun mosuroy ka sa mga merkado panahon sa kagabhion, may mga gibitay ug giladlad diha nga karne nga diha nang daan sa kaadlawon pang dako unya sa tibuok adlaw wa mahalin.

Gumikan sa pagka-bukas sa palibot sa merkado wa ka na masayud kun pila na ka gatos ka langaw ang mitugdon niana. Nasayud na baya ta kun unsang dapita ang merkado, di ba naa diha magtapok ang mga langaw ilabi na sa karnehan, isdaan, buwaran, prutasan ug uban pang baligya nga langawonon.

Sumala sa usa ka laboratory technologist nga mi-eksamin sa mga karne sa merkado sa dakbayan sa Sugbo ug Mandaue, pulos kuno may e.coli bacteria ang maong mga karne nga na-eksamin.

Kini kunong matanga sa kagaw momugna og nagkalainlaing sakit sa lawas sa tawo nga maghatag og peligro sa kinabuhi .

Taym pa klarohon ta ni , kay kun karne nga molapas og upat ka oras gikan sa pagka-ihaw niini mapuno na sa kagaw, aw di mas maayong karne gyud nga bag-o pang inihaw maoy paliton.

Kanang karne nga giladlad sa lamesa o kaha gibitay nga milapas na sa upat ka oras sukad kini ihawa angay na nga di na kana i-display diha aron nga walay matintal sa pagpalit aron nga way kinabuhi nga maalaot. Di ba?