Sugyot sa Sinulog

Matag human sa Piyesta Senyor ug Sinulog Grand Parade, dasigon namong mga nangapil sa daghan ug dagkong kalihokan pagpakigsawo sa labing mahinungdanon nilang kasinatian, sa mga leksiyon nga ilang nakat-onan ug sa ilang mga sugyot ngadto sa mga tigpasiugda alang sa mas hapsay ug mas mabulukon nga kapistahan sa sunod nga katuigan.

Sama sa among gihimo sa nangaging katuigan, among gilista ang tanan nilang mga tampo nga gipaagi sa telepono, text ug chat aron ikapadangat ngadto sa kaparian sa Basilica del Sto. Niño ug sa kadagkoan sa Sinulog Foundation Inc., Cebu City Hall ug ubang mga tigpasiugda.

* * *

Niang pipila sa ilang kasinatian ug mga sugyot sa prosesyon:

1. Mubo ra kaayong karosa sa imahen ni Sr. Sto. Niño sa solemn procession maong maglisod og kakita ang mga deboto, kun mahimo patas-an ang karosa og duha ngadto sa tulo ka tiil aron nga di na maghuot pagduol ang mga mangapil sa prosesyon;

2. Di na gamiton ang gamitoy kaayong J. Alcantara St. kay maghuot ug kuyaw nga magubot ang mga mangapil sa prosesyon, moliko sa wala gikan sa Leon Kilat paingon sa Natalio Bacalso ug moliko sa tuo paingon sa V. Rama;

3. Habwaan sa mga sagbot ang mga kanal sa ruta sa prosesyon aron nga di lawom ang baha ug di mangalisbo sa kabaho kun maatlan na sab nga magbunok ang kusog nga uwan; ug

4. Badlungon ang mga deboto sa pagpalupad og balloons kay peligrong modasmag sa mga kandila, mobuto ug makapatibuwaag sa prosesyon.

* * *

 Mao sab ni ang mga kasinatian ug sugyot mahitungod sa parada:

1. Hawanan ang sidewalks gikan sa vendors aron may kaagian ang mga manan-away ug di mapugos pagsagol sa mga mananayaw;

2. Naalkanse ang vendors nga gipahamtangan sa Sinulog Foundation og dagkong abangan tungod sa pagtugot sa mas daghang ambulant vendors; ug

3. Nakapaluag sa Fuente Osmeña ang pagpalibot sa dancing contingents apan angay’ng pasimangon pang mga mananayaw sa pikas nga lane sa kinasang-an sa Gen. Maxilom ug Osmeña Blvds. aron nga di malaktawan ang baga nga mamistahay nga mag-atang sa sidewalk sa Robinson’s.

* * *

Ug sa kataposan, ang akong naandan nga sugyot sa pag-usab sa mga lagda sa media coverage sud sa Cebu City Sports Center. Nga matag tuig na nakong gipadangat ngadto sa mga tigpasiugda apan padayon nilang gibungul-bungolan. Di makiangayon alang sa tanang hingtungdan—sa dancing contingents ug sa mas daghang katawhan nga nagtan-aw sa kabalayan ug ubang kanasuran—kun padayong ipalayo ang mga kamera sa TV networks gikan sa grand stage.

Kun ang tuyo sa foundation mao ang pagtino nga di matabonan ang mga sayaw, nganong gipasikit mang mas daghang photographers, kansang mga hulagway mahimong sila ray makakita, tungod lang kay nakabayad og P750 matag usa?

* * *

Email: [email protected]