EDITORYAL - Ang babayeng driver

Sa Manila mipakita na ang mga kadagkoan sa kagamhanan didto og dakong pagsalig sa katakos sa mga babayeng drayber aron maoy padraybon sa mga sakyanan sa gobyerno nga dumalahon sa Metro Manila Development Authority.

Usa sa mga hinungdan mao nga kasagaran sa mga babaye dili bisyuso apan seryuso sa trabaho.

Usa sa nasud-ong sa kagamhanan sa Manila mao nga mayoridad sa mga kababayen-an di moinom og ilimnong makahubog, di adis-adis, di magpatigas, ug sa laktod kaantigo motuman sa lagda sa trapiko.

Gumikan sa maong kinaiya layo ra sa disgrasya ang mga sakyanan nga manihuon sa babaye.

Kay ang disgrasya anha man manukad sa kamangtas ug kaabusado sa usa ka drayber nga mopadagan sa iyang sakyanan, nga usahay kun may problema sa iyang pamilya anha ipahimungot sa iyang pagpadagan sa sakyanan.

Kun malasbag sa ilimnong makahubog moguwa ang arti, kun magumon sa illegal nga drugas wala na siyay kahadlokan sa pagpadagan sa sakyanan.

Gumikan kay wala sa hustong hunahuna, usahay mapagan ang iyang mga inosenteng pasahero ug ang ubang tawo o kaha sakyanan nga iyang madasmagan.

Ning maong kaugmaran, dinhi masukod ang tinuod nga abilidad sa kababayen-an sa natad diin sa dugay nang panahon gidominar sa mga lalaki.

Mahimong sa ubang natad sa trabaho, sama sa mga pang-opisina, dili kalikayang mohaom kaayo ang mga babaye ilabi na kun maanyag sila, utokan, kugihan ug anaa ang tanang hiyas nga gikinahanglan sa usa ka patigayon o kaha buhatan nga naghatod og serbisyo sa publiko.

Apan diri sa mga trabaho nga sama sa pagmaneho og sakyanan, kasagaran sa mga babaye wala kaayo mohilig niini, tungod sa ilang pagtuo nga maayo lang ang maong trabaho sa mga lalaki.

Gumikan kaha sa ka-moderno na sa panahon karon ug namatud-ang mas maayo og abilidad ang kababayen-an usahay itandi sa mga lalaki kun hisgotan ang pag-atiman sa maayong kalidad sa ilang trabaho, di man tingale ngil-ad tan-awon kun mga babaye na ang magmaneho sa mga sakyanan mapasaheroan man o pribado diha sa kadalanan.

Apan ang pagpamasahero kapoy, ang pangutana makatuman pa ba kaha ang usa ka asawa nga drayber, sa iyang obligasyon sa iyang bana ilabi na ang tulubagon niya sa kama. Di   ba?