EDITORYAL - Ang OFW sa Saudi

Pagkamakaluluoy sa atong mga kababayen-an nga nanarbaho isip domestic helper o pagpa-maid didto sa Saudi Arabia. Malagmit kadaghanan kanila wala na magpahibawo sa ilang mga ginikanan , bana, kahigalaan ug mga kaila dinhi sa nasud kay di malalim ang kauwaw sa ilang kahimtang didto.

Sila si Partylist Representative Walden Bello ug Emmiline Aglipay maoy personal nga mibisita sa gitawag og OFW shelter kon dangpanan sa mga OFW nga gidumala sa embahadang Pilipinhon didto sa Riyadh ug Jeddah ug mibutyag nga naghuot na ang mga OFW didto nga nanglayas gikan sa ilang mga amo. 

Sa way lipod-lipod ug wala ika-ulaw sa maong mga OFW pagtug-an sa ilang gidangatan ilawom sa ilang mga amo nga Arabo, wa kapugngi sa mga opisyal sa Kongreso sa Pilipinas ang pagpatulo sa ilang mga luha dihang nabati nila ang makapahilap sa atay nga nasugamakan sa mga OFW nga mga babaye didto sa Saudi.

Halos silang tanan mibutyag nga nanglayas sila gikan sa ilang mga amo gumikan sa hinayop nga pagtratar niini kanila. Kasagaran patrabahuon sila gikan sa 18 ngadto sa 22 oras matag adlaw, dili hatagan og pagkaon, sirad-an sa kuwarto aron di makalayas, sudlon sa among lalaki ug lugoson, pasoan og plantsa sa among babaye ilabi na kun masayran sila nga gikabit na sa mga bana niini.

Abi ninyo may pipila baya niini kanila nga mga professional dinhi sa nasud, may mga maestra ug uban pang degree, unya bisan minyo, madanihon kaayo og lawas ug panagway nga maoy hinungdan nga di lung-an sa mga higal kaayong Arabo nga pahimuslan ang ilang pagkababaye.

May mga OFW usab nga murag miayon nalang sa pagkabit kanila sa mga Arabo nilang amo, apan anha sila masikwati kun hisayran sa asawa sa ilang amo kay diha magsugod ang kalbaryo nila, kay pasoan sila og plantsa, yab-an og pinabukal nga tubig, di na pakan-on gumikan sa pagselos niini.

Ambot kun may mga magtiayong kabus karon ug maayo ang relasyon sa bana ug asawa, may bana pa ba kaha nga mosugot nga manarbaho ang iyang asawa didto sa Saudi Arabia.

Pagka-way suwerte sa mga Pilipino uy nga nahimugso ning nasud nga kabus, kay mapugos gyud pagpangitag panginabuhi didto sa laing nasud.

Kun adunahan pa lang unta ta, di na man unta ta moadto pa sa gawas aron manginabuhi. Apan mao na ni ang atong kapalaran ug mosamot na ni kay labi nang midaghan ang mga Pilipino karon. Di   ba?