Gawas sa uwan ug sa mga sakop sa Presidential Security Group ni Presidente Benigno Aquino III wa nay laing kakulian ang pagsaulog sa Sinulog karong tuiga.
Apan labaw kay sa uwan, ang presensiya sa PSG sulod sa Cebu City Sports Center maoy nitugaw sa kamabulokon ug ka malampuson sa kasaulogan. Nakasabot ko sa ilang trabaho pag-secure sa presidente, apan angayang ibutang nila sa lugar ang ilang mga lihok.
Unang-una igo lang silang gidapit pagtambong sa kalihukan busa angayang tanan nilang lihok mag-agad sa mga organizers sa kalihukan. Apan ang nahitabo ang PSG maoy nagbuot nga bisan ang mga tigpasiugda gikuhaan na sa katungod.
Daghan ang nangreklamo sa gihimo sa PSG kagahapon tungod kay sila maoy nakatugaw sa tawhay ug kahapsay unta nga pagtan-aw sa katawhan sa Sinulog sulod sa Grand Stand.
Bisan ang mga opisyal sa dakbayan nagbagulbol tungod kay gibut-an sa PSG ang ilang mga lihok nga nakabalda sa ilang pag-atiman sa mga bisita. Tiaw mo nga ang mga kutsara ug tinidor gipang-imbargo didto sa ganghaan.
Wala sab tugoti nga maka set-up ang caterer sa pagkaon alang sa mga bisita didto sa VIP area sa Grand Stand hinungdan nga nangapasmo intawon ang uban. Maayo nalang gani kay ubay-ubay ang siopao nga giandam alang sa snacks sa mga bisita.
Duna pay ubang opisyal sa dakbayan nga gipagawas sa overacting nga mga sakop sa PSG. Si kanhi konsehal Jocelyn Pesquera nagbagulbol pud kay dili unta siya pasudlon didto sa stage atol sa misa.
Ang mga sakop sa media wala sab makalingkawas sa kaabusado ug kabalasubas sa mga PSG ni Aquino. Usa sa mga haligi sa industriya sa media dinhi sa Sugbo, ang akong higala nga si Super Bobby Nalzaro, nagkaengkwentro pud og ang mga sakop sa PSG tungod kay gusto niining ipatangtang ang ilang equipment nga nisiwil atubangan sa Grand Stand kay maka-ali kuno sa pagtan-aw ni Aquino sa Sinulog.
Wala gyud hinuon mapatangtang sa PSG ang equipment. Didto sulod sa media center usa ko sa mireklamo sa ka way batasan sa mga sakop sa PSG.
Tiaw mo bay mura og nakaminus sa mga sakop sa media dinhi sa Sugbo tungod kay gi-cordon mi og pisi. Gitakda man gud unta siya nga manubag sa mga pangutana sa media human sa iyang pagtan-aw sa pipila ka presentation didto sa stage, apan wana siya molahos og pakighinabi sa media.
Nakasabot tingali nga naglungot-lungot ang media sa gihimo sa iyang mga PSG ug ang pagsamok-samok niya sa Sinulog.
Gitangtang ra hinuon sab ang pisi human nako prangkahi ang usa sa mga opisyal sa PIA-7 nga si Mam Minerva Newman. Salamat ni Madam Newman nga maoy misulti sa mga taga Manila nga wala na kinahanglan ang ilang koralon og pisi ang mga sakop sa media dinhi sa Sugbo tungod kay mas edukado ang media sa Sugbo kun itandi sa mga PSG ni Aquino.
* * *