Once again ang Sinulog dili Mardigras ug ang kapa sa Sto. Niño dili green

Ambut ngano nga ganahan gyud silang mogamit sa pulong mardi gras. Kaha aron ingnon ngilngig silang mo-Iningles. Ug kaha, gumikan sa ilang pagka-hinan-awon og mga foreign films, ila dayong i-relate ang Sinulog Grand Parade o Festival sa mardi gras.

Once again, ania ang Lexicon Webster Dictionary, uban sa kahulogan sa pulong mardi gras: “Shrove Tuesday; the last day of a carnival celebrated in Paris, New Orleans and other cities.” Carnival ba god ang Sinulog?

Ug unsa man ning Shrove Tuesday? Ang Collins Gem Dictionary nagkanayon: “day before Ash Wednesday.” Sa ato pa, Martes Santo, sa dili pa ang Miyerkules sa Badlis, diin pahinumduman ang tawo nga bisan unsa kita ka gamhanan ug kadaghan sa kwarta (kinawat o dili), bisag dili kita gustong mobuhi sa gahom, kay nindot gyud kaayo ang gamhanan … sa gusto tag sa dili, pauli gyud ta sa abog.

Unsa man ang Sinulog? Shrove Tuesday ba? Kun mardi gras ang Sinulog, unsa man ang “a day before the Sinulog, Martes Santo ba, nga ka-layo pa sa Semana Santa? Mao kini ang kahulogan sa mardi gras. Nganong ma-mardi gras man ang Sinulog? Aron lang gyud ingnon nga nindot tang mo-Iningles? In the first place,di man sad tingali ni Iningles.

Ug lain pa, ambut kinsay nag-imbinto ining berde nga saput sa Sto. Niño, nga daghan man usab ang misunod? Swerte kono. Maayo sa negosyo. Sa ato pa, ilang gihimong employment agent ug economic czar ang Sto. Niño.Moy gidangat. Mao ni ang giingon sa uban, kining atong pagka-Katoliko pinasagad lang kono. Ngano god tawong na-green man ang saput sa Sto. Niño?

Naunsa na man ta ini, Dro uy? Unya, angay hunahunaon nga balaan ug solemne ang kasaulogan sa Piyesta Señor, ug ang Sinulog, pahinungod sa Balaang Bata, dili Ati-Atihan, dili Dinagyang, dili mascara, dili bulingbuling, ug labaw sa tanan, dili huboghubog, dili kiatkiat. Clean fun.

Pure Cebu kini. Di kinahanglan moawat kita sa ubang celebration. Mao kini ang naka-unique sa Sinulog. Maoy hinungdan nga dugokon kita dinhi sa minilyon ka dumoduong, mga devotee sa Santo Niño ug mga turista.

Hinumduman nga sa pagmugna niini ni Boy Odilao, ang katuyoan mao ang paghatag og socio-cultural nga aspeto sa religious celebration, kay sa unang mga panahon, it was solely a religious event. 

Dili nato hikalimtan ang hinungdan nganong dunay Sinulog. Ug nalipay kita nga ato kining napakita matag saulog sa Piyesta Senyor, kay mao may atong unahon ang religious aspect sa kasaulogan. Mao man gani hinungdan nga bisag matumog na kita sa ulan, padayon ang atong pagdebosyon sa Sto. Niño. 

Pit Senyor kanatong tanan!