Iring ug ilaga

Ang ubang tindera sa Fuente Osmeña daw susama sa mga ilaga nga kun layo ang iring, magtagbaw sila’g duwa.

Tiaw mo, miabot ang report sa opisina ni Mayor Mike Rama nga maninda man diay og beer ang mga tindera diha sa Fuente Osmeña panahon sa gabii.

Ang among police reporter sa THE FREEMAN akong gipamalihug pag-interview sa kapolisan kun unsay ilang himoon. Pastilan, abi ninyo og unsay tubag?

Wala pa kuno sila makadawat og kamandoan gikan sa mayor. Pastilan, kaignorante gud diay sa uban nga polis kun mao kana.

Bisan og kontrobersyal na kini kaayo nga isyu wala gayud kamo makahuna-huna paghimo’g pagtoon kun angay pa ba nga maghuwat mo’g kamandoan sa mayor kun may molapas sa balaud?

Kun makakita diay kamo og tawo nga naghubog-hubog diha sa publikong lugar moingon ba gihapon kamo nga maghuwat pa mo og order sa mayor? Pastilan, kun si kanhi Konsehal Jack Jakosalem pay inyong ikaestorya ingnon g’yud mo nga “Pagkatoytoy G’yud.”

Basaha ang City Ordinance 1413 Sir aron dili na kamo maignorante sa balaud. Mahimo usab nga nagpa goryo-goryo ra kadtong polis sa Fuente nga gipangutana sa akong kauban.

Giingnan g’yud ko ni Mayor Mike nga dili g’yud siya makatugot nga may makapamaligya og beer diha sa mga gidili nga lugar.

* * *

Kagahapon, nagsakripisyo ko paghatud sa imahen ni Senyor Santo Niño gikan sa Basilica paingon sa Saint Joseph National Shrine didto sa dakbayan sa Mandaue.

Karong buntag, kami sa DYLA mohimo’g buhing paghulagway sa fluvial procession. Unya karong hapon, magsakripisyo ko paglakaw subay sa taas kaayo nga rota nga anha moagi ang prosesyon sa imahen ni Santo Niño.

Matag tuig na nga ako kining saaran ug kinahanglan g’yud nga tumanon. Kadtong dunay mga dagko nga sound boxes ug sound systems, paminaw kamo sa DYLA kay aron madungog ninyo ang novena sa Basilica.

Ang among estasyon maoy official station sa Sinulog 2011 ug maoy gitahasan nga mopabati sa novena gikan sa simbahan aron anha maminaw ang mga moapil sa prosesyon.

* * *

Ugmang adlawa, sa makausa pa igahin nako ang akong lindog sa pagyukbo ni Senor Santo Niño pinaagi sa pagpaambit kaninyo sa iyang gahum nga pagluwas nako gikan sa kamatayon.

Malaumon ko nga unta ang akong kaagi makatabang sa pagpahugot sa inyong pagsalig kang Santo Niño. Abi ninyo, hugot kaayo ang akong pagtoo kaniya. Siya ang akong manluluwas. Kun wala pa siya, patay na ako kaniadtong Hulyo 25, 1995.

* * *

Giusab man diay ang tugtog sa Sinulog karong tuiga. Mas paspas na ang tugtog kay sa karaan nga Sinulog tune. Gituyo tingali kini kay pahaum sa Chinese nga tema karong tuiga.

Buyno, alang kanako kining kusog nga tugtog maayo usab kay moabtik ang lihok sa mga dancer ug dili laay nga tan-awon.

Sa adlaw sa pagpahigayon sa Sinulog mardigras, adto ko magbasi sa Fuente Osmeña.

Doble tawon kining akong tahas. Sa buntag pa, mohatag og paghulagway sa panghitabo sa Sinulog, apan pagkahuman sa kalihukan, moabag na kami sa Task Force Alpha sa pagkontrolar sa trapiko.

Serbisyo publiko gihapon alang sa atong mga igsoon ni Kristo!