Pag-Ibig

Tumpak nga marahil sa tuwid na landas

korapsyon sa bansa ay pwedeng mawasak;

Pero kung ang daan sa gitna ay burak

sa landas ni P-Noy ay baka malubak!

Mainam sigurong mga nagbibiyahe

ay may pusong banal at diwang mabuti;

At saka pag-ibig ang nakabaluti

sa dibdib ng taong tapat ang lunggati!

Kung walang pag-ibig sa dibdib ng tao

mga pagsisikap ay bigo rin ito;

At itong korapsyong narito sa mundo

lalong lalaganap sa lahat ng dako!

Kaya pag-ibig lang ang tanging solusyon

sa masamang gawing dulot ng korapsyon;

Halimbawa nito’y negosyong mayabong-

mga magkasosyo’y matapat ang layon!

At sa pulitika tuwing may halalan

ang magkatunggali’y matapat sa laban;

Pagka’t mahal niya ang kanyang kaaway

hindi mag iisip na ito’y pumatay!

Saka ang pag-ibig sa babaing sinta

magiging dakila sa pag-ibig niya;

Hindi maghahangad nang maraming pera

para maging tampok ang kasalan nila!

At upang maglaho korapsyon sa bansa

lahat ng gagawin ay laan sa madla;

Hindi magnanais manlamang sa kapwa

mga pagsisikap salig sa konsensya

Kaya kung pag-ibig ang paiiralin

ng lahat ng tao sa daigdig natin;

Itong Pilipinas kaisang damdamin-

na ang kasamaan ay dapat itakwil!

Saka ang korapsyong talamak sa tao

dahil sa pag-ibig maglalaho ito;

Kung sa Pilipinas puso’y makatao

itong buong bansa’y tiyak aasenso!