Yahoo ni Vidal

Bisan duna nay pinuy-anan sa Sto. Niño Village sa Banilad, Cebu City, si Arsobispo Ricardo Kardinal Vidal di mopuyo dinhi sa Sugbo sa unang duha ka tuig human sa iyang pagkanaog gikan sa Archbishop’s Palace. Gipahibawo ni Kardinal Vidal atol sa kataposang tigom uban sa kaparian nga adto siya mopuyo sa lain niyang bay sa kaulohan.

Nipasabot ang kardinal nga gitumong ni niya aron kahatagan og hingpit nga kagawasan si Bishop Jose Palma sa pagpuli pagduma sa Artsidyosesis sa Sugbo. Nabalaka siya nga mabakikaw ang unang mga adlaw sa pamunoan ni Palma kun magpabilin siya dinhi sa Sugbo ug madalidali ra gihapon pagduol ug pagkonsulta sa kaparian.

* * *

Gihimong pananglitan ni Kardinal Vidal ang pagpahuway pila ka tuig nang nilabay sa usa ka obispo sa silingang rehiyon. Kay nagpabilin man sa diyosesis bisan niretiro na, ang inila nga obispo padayon nga gidangpan di lang sa kaparian kun dili sa nagkalainlaing sektor sa katilingban nga nangayo og giya sa simbahan.

Maong makaluluoy ang nakapuli nga obispo, nga nadestino sud sa pila ka tuig dinhi sa Sugbo. Kay lahi man kaayo ang iyang estilo sa liderato, naapiki siya sa matag higayon nga gitandi sa iyang gipulihan. Di ganahan si Kardinal Vidal nga mahiagom sa samang kahimtang si Bishop Palma maong mobiya una siya ug unya na sa 2012 mobalik.

* * *

Way bisan usa, bisan si Kardinal Vidal mismo, nga nagtuo nga anhi sa Sugbo siya mopili pagpuyo human sa iyang pagretiro. Kay dihang unang gitanyagan nga ibalhin dinhi, kusganon siyang nisupak. Ang iyang labing dakong kahadlok mao ang iyang nadunggan nga ang mga Sugbuanon labihan kamahigugmaon sa ilang pinulongan ug di siya kamao nga mo-Binisaya.

Apan ang tanan niyang panagana nawagtang sa unang adlaw sa iyang pagka-destino dinhi. Nga niadto pa lang nisaad na siya nga anhi sa Sugbo puy-an ang kataposang gutlo sa iyang kinabuhi. Ug human sa 29 ka tuig niyang pamunoan, naanad nang mga Sugbuanon sa iyang matang sa Binisaya.

* * *

Sa labing unang higayon, nakasud ko sa buhatan ni Kardinal Vidal atol sa among taping sa Halad sa Kapamilya sa ABS-CBN Channel 3. Nahipos nang iyang mga libro ug ubang kabtangan ug nagsugod na og pangabot ang mga butang ni Bishop Palma. Labihan kayano sa buhatan nga nahimong saksi sa pag-umol sa labing mahinungdanong mga desisyon sa Simbahang Katoliko nga nakaapektar sa Sugbo ug sa nasud.

Atubangan sa lapad nga pasidungog, kahinugon ug paghigugma nga gipadayag sa mga Sugbuanon sa iyang pagbiya, nakugang ko pagkakita sa call card sa “The Roman Catholic Archbishop of Cebu.” Nga sama sa ubang mga tagduma sa mga buhatan naglista sa iyang address ug telepono. Nalingaw ko pag-ayo pagkakita nga duna diay siyay Yahoo address.

* **

Email: [email protected]