EDITORYAL - Ang pag-sex sa tawo

“Public sex ban eyed in Boracay” usa ka headline sa nasudnong pamantalaan, di para sa mga hayop kundi para sa mga tawo.

 Kay ang mga hayop nga komon kaayong mag-sex sa kadalanan ug bisan asang lugar nga iya sa publiko wa did-i nga mag -sex .

Kini tungod kay ang kultura sa mga Pilipino puno sa delikadesa ug di madawat nga ang mga butang nga bahin sa pakighilawas sa lalaki ug babaye bisan asa lang himoa.

Buot lang ipasabot nga may kauwaw pa ang mga Pilipino kun hisgotan ang sex, tungod kay giisip kining usa ka sagradong butang nga bisan lami tuod kaayo apan ibutang sa hustong dapit nga dili ka makahimo og eskandalo.

Hinuon ang gihatagan og kagawasan gikan sa kulturanhong kinaiya mao ang mga Pilipino nga mag-sex diha sa pelikula.

Kini tungod kay gihimong legal ang ilang romansa ug pakighilawas gumikan lang kay may permiso sila sa gobyerno.

Mao bitaw usahay nga daghan kaayong ganahan nga mag-artista tungod kay libre sila sa tanan, nga bisan ang butang nga angay untang tago-an sama sa pakighilawas, pinaagi sa pelikula, mahimo na nila kini bahala na og maglaway ang manan-aw.

Sa pagkatinuod, walay tawo nga dili ganahan sa sex tungod kay una sa tanan sugo kini sa Ginoo,apan gusto sa Ginoo nga kun magbuhat sa ingon, kinahanglang himoon pinaagi sa kahusay ug katahom.

Diha sa pag-sex nga “live” o akto nga pakighilawas sa lugar nga iya sa publiko, naa bay kahusay diha nga kun adunay maglagot kay giganahang nagtan-aw kaninyo basin panigbason pa mo.

Naa pa bay katahom diha nga kun gusto mong mohimo og nagkalainlaing posisyon aron mahimong matahom o ganado kaayo ang inyong kombati, adunay manan-aw nga manghimaraot kaninyo.

Sa laktod ang pag-sex sa publikong lugar dili buhat sa mga tawong normal ug tarong, kundi buhat sa wala sa hustong pangisip sama sa hayop.

Ang Boracay giila nga usa sa labing matahom nga lugar sa kalibotan nga paborito sa mga turista apan igo lang suroyanan ug dili displayhanan sa buhat nga sex, kay gani si Adan ug Eva dihang didto na sila sa lugar nga iya sa publiko , sa gawas sa harden sa Eden nanagtapis gani sila bisan mga mananap ray tumatan-aw kanila kay may kauwaw sila . Di ba?