Year of the rabies

Kadtong pagpabasa ni Mayor Mike Rama sa mga pyrotechnic products nga mokantidad og tres milyones ka pesos maoy pagpakita nga grabe na gayud ang panagbangi sa mayor ug ni Kong. Tom.

Ang tag-iya niining maong mga produkto, si Bryan Lim, sumala pa, suod nga higala ni Kong. Tom.

Adunay paninguha sa mga konsehal nga suod ni Kong. Tom nga dili mahinayon ang pagbasa sa maong mga pyrotechnic products apan human sa pagdiki-diki gipabasa gayud kini sa mayor.

Akong gipaabot nga mograbe na ang panag-away nila ni Mayor Mike ug Kong. Tom.

Gipaabot usab nga magpadayon ang karambola nila ni Gobernador Gwen Garcia ug Bise Gobernador Greg Sanchez karong tuiga.

Mao usab kini ang sitwasyon sa ubang mga siyudad ug kalungsuran sa Sugbo ug sa tibook nasud.

Tungod niining pagpina-akay sa atong mga politiko ato na lang tingaling tawgon kining 2011 nga “Year of the rabies.”

* * *

Gikapoy nako’g paminaw niining lalis kun pila na ang angayang plitihan sa mga taxi, PUJ ug bus.

Unsa man gayud ang basihanan sa Land Transportation Franchising and Regulatory Board (LTFRB) sa pagpa-umento nila sa pletihan sa taxi?

Dugay na nga gisugyot namo’ng mga sakop sa Cebu People’s Economic Council (PEC) nga kinahanglang adunay sagupon nga formula ang LTFRB aron automatic ang pagpasaka o kaha pagpaminus sa plitihan kun mosaka o mominus ang presyo sa gasolina ug diesel.

Mao kini ang kanunay basihan sa mga drayber ug operator sa pagpangayo og umento sa plitihan. Ang presyo sa spare parts dili man kanunay nga moumento.

Dili man unta lisud ang pagkwenta niini apan wa ko kasabut nganong hangtud karon wala pa gayuy tarong nga formula ang LTFRB kalabut niini.

Hinaut pa nga ang akong mga higala nga sila si Atty. Manuel Iway sa LTFRB board ug ang bag-ong LTFRB Regional Director Ahmed Cuizon makatabang sa pagpangita niining maong formula aron wala nay lalis ingon man transport strike.

By the way, dili ba supak man si Atty. Iway niining pagpa-umento sa plitihan, nganong nausab man karon ang iyang baruganan?

* * *

Kining pag-file sa statement of assets, liabilities and net worth (SALN) sa mga opisyal sa gobiyerno walay hinungdan.

Ako nasayud nga doktoran ra sa ubang mga opisyal ang ilang SALN sigun sa ilang tumong ug tuyo.

Ang naghunahuna og pangawat samtang mag-alagad sila sa gobiyerno mopaburot sa ilang SALN.

Dunay daghang mga tawo, labi na ang mga politiko ug ang mga naghupot og humot kaayong mga pwesto sa gobiyerno, nga rabanit kaayo kaniadto apan sapi-an na kaayo karon.

Wala gyud mahibung niini ang Office of the Ombudsman o ila ba lang kining gitugutan kay mao usab kini ang gihimo sa uban kanila?

* * *

Wala na makasabut si Arsobispo Ricardo Cardinal Vidal nganong wala mapugngi ni Mayor Soc Fernandez ang iyang anak nga si Joavan nga kanunay’ng magpabadlong.

Ako nagtoo nga gibadlong na si Joavan sa iyang amahan apan dili lang gayud kini magpatoo.

Hinaut pa’ng tinood ang balita nga mag-usab na si Joavan sugod karong tuiga aron dili siya mahimong morag koniho o rabbit nga isulod sa tangkal.

* * *

Daw gikumot ang akong kasingkasing nga nagtan-aw sa mga kaigsoonan natong masakiton nga nangutana kalabut sa akong gihisgutan nga natural product.

Si Mr. Jorge Ledesma, Diamond distributor sa 4Life products, maoy nipasabut sa epekto niining maong natural product. Iya usab nga gi-refer ngadto sa mga doctor ang adunay grabe na nga sakit, sama sa advance stage of cancer, aron tambagan sila kun unsa’ng klase ang angayan nilang imnon.

Nagpasalamat ako sa kahitas-an nga gihatagan ako og kahigayonan nga makatabang sa pag-alibyo sa gibati sa mga masakiton.

* * *

Email: [email protected]