Kinsay modaog nila?

Kung magpadayon ang personal nga kasungian, wa’y mogawas nga mananaog sa tinguha nga hingpit nang mahatag ngadto sa mga residente nga nagpuyo sa 93-1 ang ilang luna ug matukod na ang proyektong Ciudad uban ang lalawigan sa Sugbo. Ang labing bag-o nga reaksyon batok ni Kongresista Tomas Osmeña batok sa panagtagbo ni Cebu City Mayor Mike Rama ug ni Gobernador Gwen Garcia ang subling nibanhaw sa tinguha sa lalawigan nga matukod ang proyekto niini sa syudad sa Sugbo. Apan sa usa ka opisyal, sama ni Osmeña nga sirado nang daan ang huna-huna sa maong lakang ni Garcia, ingon og di’ pa makita ang kahayag sa kalambuan sa maong transaksyon.

Apan siguradong daog ang kapin sa singko mil ka mga pamilya nga nagpuyo sa mga luna sa 93-1 tungod kay samtang wa’ pay kongkretong lakang ang duha ka habig ug hangtud nga di’ pa klaro kung moabot ba ang adlaw nga magka-uyon silang duha, magpabilin ang mga residente sa luna nga ilang gi-okupa karon. Kung sa mga miaging buwan naputos sa kabalaka ang mga residente nga basin gamiton na sa lalawigan ang ngipon niini aron mapapahawa sila sa luna nga iya sa probinsya sa Sugbo, karon magsadya ang mga tawo tungod kay daghan ang maipit kun o galing ipugos ang pagpabiya nila gikan sa kontrobersyal nga luna.

Mapildi si Gobernador Gwen Garcia kung ipugos niya ang pagpabakwit sa mga tawo nga nagpuyo sa 93-1 labi pa kung matinuod ang giingong plano sa gobernador nga modagan pagka-senador sa sunod nga piniliay. Ana-a na sa ika-tulo nga termino isip gobernador sa Sugbo si Garcia ug ang sunod nga dagan sa iyang karera sa politika mao ang mas taas nga posisyon. Dako og mahatag nga boto ang mga tawo nga nagpuyo sa 93-1 kun di’ sila hilabtan sa gobernador. Maayong puntos ‘sab sa pamilya Garcia kung patuyangan ang mga tawo sa pagpuyo sa luna labi pa alang sa mga sakop sa ilang pamilya nagplano pang magpabilin sa politika. Ang mga planong joint venture tali sa pribadong sektor ug sa Kapitolyo, pildiro kung ang maong isyu ang hisgutan.

Pildi ‘sab ang mayor sa Sugbo, Mike Rama sa iyang pakigtagbo sa gobernador tungod kay bisan asang anggulo tan-awon, wa’y igong gahum ang mayor aron iyang mahatag kang Garcia ang pagtugot nga makasugod na pag-develop sa Ciudad nga usa ka mall sa may Banilad. Angayan tan-awon sa mayor nga moagi pa gihapon ang tanan sa pag-aprobar sa konseho. Nasayod nang daan si Rama nga di’ niya kontrolado ang konseho tungod kay tua pa sila nagtan-aw og dakong utang kabubut-on ni Kongresista Tomas Osmeña, ang giisip nilang amahan sa politika ug pangu’ sa ilang grupo. Pildi si Mayor Rama tungod kay luyo siguro sa iyang tinguha nga mahilot na ang kasungian ug kasugdan na ang proyekto, mas lawom nga samad pa hinuon ang dalit niining libaong nang daan nga relasyon sa duha ka dagkong opisyal sa Sugbo.

Pildi ‘sab ang mga konsehal sa Sugbo kun padayon silang magpagawong kang Osmeña. Kung aduna may tukmang higayon aron ilang ipakita ang ilang pagkagawasnon sa pagdesider sa mga isyu, kana mao karon. Apan sa dagan sa prinsipyo sa konseho sa dakbayan, di’ ikalimod nga mas pa nilang paminawon o respetuhon ang baruganan ug desisyon sa ilang kanhi mayor nga si Osmeña. Pildi ang mga konsehal nga wa’y baruganan sa isyu ug igo nalang magpadiktar sa unsay gikasabotan sa kadaghanan. Sa usa ka demokratiko nga nasud, adunay kagawasan ang bisan kinsa nga mopanday sa iyang prinsipyo. Apan magdepende ang tanan kung gi-unsa pagtimbang-timbang ang tanan sa di’ pa mohatag sa baruganan. Pildi ang tanan tungod kay hangtud nga wa’y kalambuan nga mahitabo, wa’y kausaban nga mapanday ug wa’y pag-uswag nga mapaabot.

* * *

Email: [email protected] or [email protected]