Giputol ni Mayor Ricky Ramirez ang ayuda nga gihatag sa iyang lungsod ngadto sa iyang kapolisan tungod sa kalagot niini sa director sa kapolisan sa lalawigan sa Sugbo. Ang giputol sa mayor mao ang ayuda sa gasolina, telepono, koryente, motorsiklo ug bugas.
Si Mayor Ramirez naglagot ni Sr. Supt. Erson Digal sa paglambigit sa iyang pangalan sa kamatayon ni Edilberto Abao kinsa team leader sa Mayor Squad. Gustong piangan ni Ramirez ang mga police sa iyang lungsod aron mapugos si Digal sa paghatag sa iyang kagustohan. Gusto sa mayor nga mangayo kaniya og pasaylo si Digal ug ibalik niini ang hepe sa iyang kapolisan nga gihulipan ni Digal. Apan nagdumili si Digal sa paghatag sa gipangayo sa mayor. Resulta giputol sa mayor ang ayuda sa lungsod ngadto sa iyang mga police.
Karon kinsa man ang apektado sa gihimo sa mayor? Si Digal ba o ang iyang mga police sa Medellin? Kun may maapektuhan man sa gihimo sa mayor walay lain kun dili ang iya ra usab nga katawhan nga iyang gisaaran nga protektahan ug alagaran.
Tungod kay giputlan niya sa linya sa telepono ang iyang mga police, unsaon naman lang unya pagtawag sa mga tawo ngadto sa ilang mga police kun ugaling adunay krimin nga mahitabo nga wa naman silay telepono. Unsaon man sa iyang mga police pagdali pagtubag sa alarma sa krimin nga wa naman kini kasakyan kay iyang gibawi ang motorsiklo? Unsaon man pagka abtik sa iyang mga police pagtubag og alarma sa krimin kun mga pasmado kini kay giwagtang na kanila ang ilang rice subsidy?
Kun ingon ani ang sitwasyon, dili si Digal ang magka problema kun dili ang iyang katawhan sa Medellin kinsa dali na unyang biktimahon sa mga kriminal nga magpatuyang na lang unya sa ilang pagahimoon tungod kay luya na ang mga police.