"Anti-poor"

Nangreklamo ang local nga mga hog raisers dinhi sa Sugbo tungod sa giingong pagdagsa sa mga imported meat products nga nakaapiki sa ilang negosyo.

Matud sa mga local hog raisers nga mas barato ang mga imported meat products tungod kay dili kini luwas alang sa panglawas sa mga konsumidor. Ang propaganda sa mga local hog raisers batok sa mga imported meat products daw sa gisakyan sab sa atong gobyerno labi pa sa mga local government units.

Ang Department of Agriculture miluwat og Administrative Order Number 22 nga naglatid sa mga lagda unsaon pag-handle ang mga frozen ug chilled meat products diin gi-single out ang mga imported meat products.

Tungod sa maong kamanduan, diin ang National Meat Inspection Service maoy gitahasan pagpatuman, dili na mahimong ibaligya ang mga imported meat products didto sa mga wet markets tungod kay way mga freezer nga kabutangan niini.

Dili makatarunganon ang maong lagda alang sa mga negosyante og karne nga imported tungod kay ang gobyerno mismo nagkuwang sa ilang obligasyon. Ang pangutana, duna bay igo nga imprastraktura ang gobyerno diha sa mga wet markets nga magamit sa mga negosyante og imported meat products?

Dili ba ang mga local government units man maoy nagdumala sa hapit tanang mga merkado? Gawas niini kwestiyonable kun dili man illegal ang pagpatuman sa mga LGU sa administrative order no. 22 sanglit way klarong implementing guidelines unsaon ni pagpatuman.

Illegal sab tungod kay gi-delegate sa NMIS ang pagpatuman niini ngadto sa mga LGUs nga ubos sa batakang prinsipyo sa balaud dili mamahimong i-delegate ang usa ka delegated power ngadto sa laing ahensiya o tawo.

Sanglit ang pagpatuman sa AO 22 delegated man lang ngadto sa NMIS gikan sa Department of Agriculture intunsis dili niini mahimong i-redelegate ang maong gahom ngadto sa mga LGUs.

Sayop sab ang pagtuo nga delikado nga kan-on ang mga imported meat products tungod kay pruweba niini mao nga sagad sa mga barbecue nga gibaligya mga imported ni nga karne.

Kini tungod kay mas barato ni ug mas limpiyo kun itandi sa mga karne nga giihaw lang diha sa kilid-kilid.

Nganong mas limpiyo? Tungod kay ang tinubdan sa maong mga karne gikan sa mga nasud sa Uropa, Australia ug Canada diin labihan ka istrikto ang ilang gobyerno sa health standards.

Dihang giihaw ang maong karne sigurado ta nga wala na gyud ni motugkad og yuta hangtud nga gibutang sa storage ug na-frozen. Kun ang atong kabalaka mao nga kontaminado ang maong mga karne, ang tubag mao nga basi sa pagtuon dili mabuhi ang kagaw sa mga frozen nga produkto.

Kun mao mas peligro pa ang mga karne nga wala moagi og freezer nga gibaligya diha sa merkado tungod kay gawas nga wala ta makasiguro og diin ihawa dili sab ta sigurado unsay gikargahan atol sa pagdeliver niini.

Dili ba kaha gikan ni sa mga karne nga giihaw diha sa kilid-kilid unya gideliver sa merkado sakay sa buyay-ang kaayo nga tricycle ug gihakot sa mga kargador nga nagkadusingot ug wala pa gani’y ligo?

Sagad sa mga mopalit sa imported nga karne mao ang mga kabus tungod kay mas kubos man ang presyo niini. Busa ang pagdili sa pagbaligya sa mga imported nga karne diha sa mga wet markets alang nako mahulagway nga “anti-poor” nga polisiya sa gobyerno.

* * *

[email protected]