Hadlok sa tipos

Dihang nagpislango ug nanakit ang akong lutahan sa niaging semana, gikuyawan ko. Kay didto ko sa Danao City General Hospital dihang niulbo ang epidemiya sa diarrhea. Ug didto sab ko sa Alegria dihang niulbo ang epidemiya sa tipos. Wa kaha maigo sa managkaluhang epidemiya ang kapin na sa 20 anyos (nga kapin na sab sa 20 ang kapin) nakong lawas?

Samtang didto mi sa Danao, puwerte namong higop og tinowang isda sa Danao City Fish Port. Puwerte sab namong pangaon og manok Bisaya atubangan sa munisipyo sa Alegria. Binotelyang tubig ang among giinom apan wa mi kahibawo diin gikan ang tubig nga giluto sa mga pagkaon.

* * *

Bisan nitubod nang akong sip-on ug nagsugod nag hilanat, wa ko motug-an sa akong asawa. Kay higpit ko niyang gipasidan-an sa di pagkaon sa Danao ug Alegria. Ug kun makakaon man gyod, seguruon nga nag-asu-aso sa kainit ang pagkaon. Pulos bugnaw nang tinowa sa Danao ug manok Bisaya sa Alegria nga among gipaniudto.

Nisamot ang akong kahadlok dihang giingnan kong Rachel Dangin, akong kauban sa Alegria, nga ang among kuyog nga cameraman, si Jojo Satuita, ug ang nagluto sa among paniudto atbang sa munisipyo pulos gipanghilantan sud na sa pila ka adlaw. Gitugotan na tuod ko sa korte nga makalarga alang sa Pasko, apan unsaon na lang kun nataptan ko’g kagawng makamatay?

* * *

Hangtod nga wa na matago ang akong sakit. Ping-ot na kaayong akong tingog. Naglisod na ko’g bangon. Gidid-an na ko sa akong asawa nga makatrabaho. Bisan gipasaligan nako siya nga ordinaryo rang akong sip-on, nangonsulta siya sa iyang mga higalang doktor ug nihukom sila pagsugod na nakong antibiotics.

Nitagam na man gung akong asawa. Gawas nga di gyod ko mosulti niya unsay akong sakit hangtod nga maluya na kog maayo, nahasol sang usa sa among mga bakasyon dihang wa kong kabangon og pila ka adlaw tungod sa grabeng atake sa sinusitis. Guilty kaayo siyang nag-shopping samtang nagbad-ay ko sa higdaanan sa among hotel.

***

Nakaginhawa ko’g luag. Bisan sa grabeng kaluya wa ko magsige’g adto sa pansayan. Nga maoy nag-unang timaan sa diarrhea ug tipos. Gawas nga mabuhi, makabiyahe pa diay ko.

Nagduda na diay’ng daan ang akong asawa. Sunudsunod na ko niyang nasakpan nga nipauli nga nagbaktas gikan sa trabaho. Maong human nakonsulta ang espesyalista nga nitambal sa unang atake nako sa sinusitis, nakumbinser siyang nahibalik ang akong kinaham nga sakit. Ug, sama sa naandan, saktong iyang reseta. Makaginhawa na ko’g balik sa akong ilong, nigawas nang akong tingog ug, labaw sa tanan, ganahan na sang makiglalis. Nga bisan sa pasidaan nga puwerteng tugnawa sa Hong Kong, tapot sa lawas ra gihapon ang sapot nga akong dad-on.

* * *

[email protected]

(BANAT NEWS)