Pulis-pulis si piskal

Nabatasan na ba ni Mandaue City Prosecutor Beinvenido Mabanto ang pagpangulata sa matag-driver nga iyang masakpang molapas sa lagda sa trapiko diha sa dakbayan sa Mandaue?

Dili pa dugay nga si Mabanto gireklamo sa driver sa Ceres Bus nga si Rolando Lequin tungod sa matud pa pagpanagpa kaniya. Karong bag-o usa nasab ka Japanese national ang mireklamo nga nabiktima sa pagpangulata ni Mabanto.

Si Tamotsu Miyauchi, 46, mipasangil nga gibabagan siya ni Mabanto ug gikulata uban ang mga sakop sa kapolisan ug mga traffic enforcers. Sumala pa sa hapon nga nagmaneho siya sa iyang motorsiklo didto sa Barangay Bakilid dihang kalit siya nga gibabagan og sakyanan.

Matud sa hapon nga iyang gitoktok ang bintana sa sakyanan aron komprontahon ang driver nga dili maayo ang iyang gihimo nga pagbabag. Apan kalit nga migawas si Mabanto, giingong nagpaila nga usa ka polis.

Nagkanayon ang hapon nga dunay gitawgan si Mabanto sa iyang cellular phone ug wala magdugay niabot ang mga pulis. Sumala pa sa hapon nga ang mga pulis mibun-og ug midakop niya ubos sa mando ni Mabanto.

Si Mabanto sa iyang bahin nangangkon nga gidumbol ni Miyauchi ang iyang Kia Rio. Dihang iyang gisita ang hapon giingong mitukmod hinuon kini kaniya hinungdan sa iyang pagkaangol.

Si Mabanto nangangkon nga nasamad ang iyang wala nga siko tungod sa hitabo. Apan ang pangutana nganong Sabado na sa buntag mireport si Mabanto sa danyos sa iyang sakyanan?

Nganong dunay additional injury siya nga gireport didto sa Subangdaku Police Station? Dili na bag-o ang pasangil sa pagpangabuso batok ni Mabanto. Dili pa dugay gireklamo siya sa usa ka driver nga iyang gisagpa.

Gawas nga gisagpa iya pa gyud nga gipapriso, susama gihapon ang dagan sa estorya ni Mabanto nga misukol niya hinungdan nga iyang gipadakop. Nganong kinahanglan nga bilangguon ang usa ka tawo kun simple nga paglapas lang sa lagda sa trapiko ang iyang nabuhat?

Bisan kinsa nga driver kun dili nimo ayohon sa pagtratar mapugos gyud kini pagsukol. Labi pa og arogante sab ang modakop.

* * *

Ang Ombudsman kanunay’ng nagpahinumdom sa mga opisyal nga bawal ang pagpangayo og regalo karong panahon sa Pasko. Apan sa bag-o lang gihimong Christmas Party sa usa ka buhatan sa gobyerno, usa ka opisyal ang wala lang mangayo og lechon sa ilang mga kleyente gisulo pa hapit ang tanang lechon nga miabot sa ilang opisina.

Nagpanlad-ok intawon sa laway ang iyang mga sakop kay gipundok sa maong opisyal ang daghang lechon sa iyang opisina. Matud pa sa akong tinubdan nga matag tuig mao kuno ni ang buhaton sa ilang amo.

Human sa party sa opisina nagbagu-od ang maong opisyal og hakot sa lechon nga iyang gitaguan. Pagka baga og nawong, gigamit ang party sa iyang opisina pagpangayo og lechon apan iya diay’ng gihakot paingon sa ilaha.

* * *

[email protected]