Bag-ong engineering dist. sa tinguha ni Quisumbing

Kadtong Hapon nga mireklamong nakulatahan sa Mandaue posibleng mag-atubang og daghang kaso kun idayon sa piskal nga iyang gipasanginlang maoy mipasakit kaniya.

Si Fiscal Bienvenido Mabanto Jr., ang prosecutor sa dakbayan sa Mandaue ug maoy vice chairman sa traffic commission sa maong dakbayan, desidido nga mopasaka og kaso batok kang Tamotsu Miyauchi.

Ang piskal hugot nga mihimakak nga siya’y nakabun-og kang Miyauchi.

Matud niya nga sa dihang natumba siya sa dihang giaksiyonan siya og dasmag sa motorsiklo ni Miyauchi, dihay babaye nga nakasinggit “tabangi na ninyo si sir oi, mga Pinoy gud ta” maoy nakapaaghat sa mga usyosero ug mga estambay nga mitapok sa lugar sa pagkulata kang Miyauchi.

Dili mo-ubos sa napulo ka tawo ang midumog sa Hapon. Sa akong pamati, naluoy tingale ang mga tawo nga nagtan-aw sa isguon niyang Pilipino nga nalup-og sa karsada kay giaksiyonan og dam-ag sa gimaneho niining motor.

Gawas sa kasong kriminal nga giplanohang isang-at ni Mabanto batok kang Miyauchi, tinguhaon pa gyud ni Mabanto nga mapa-deport kini balik sa iyang gigikanan nga nasud, ang Japan pinaagi sa pagpakig-alayon sa mga tinugyanan sa Bureau of Immigration.

Si Mabanto nakadawat usab og impormasyon nga daghan og kontra ang Hapon didto sa Sogod, samtang napriso na usab kini didto sa Macrohon, Southern Leyte.

Katungod usab sa Hapon ang pagpasaka og kaso.

Apan kun wala pa tingale kini si Miyauchi dinhi sa Pilipinas, dili unta siya makasugat og ingon nga demalas. Hehehe. Duna bitaw usa ka nasud nga kun madam-ag ka og sakyanan, ingnon man ka sa polis nga “sala na na nimo, kay kun wala pa moanhi sa among nasud, dili unta ka madam-ag.”

Pagkasubo nga palandungon, apan tinuod kini.

Ug kun magbinuotan lang ang usa ka langyaw, dili man tingale kini mabutang sa alanganin.

Dili baya nato ikatago ang kamatuoran nga aduna usay mga langyaw nga hilabihan kamaldito ug hilabihan nga maka-lookdown sa mga Pilipino. Kun ako’y makasugat og ingon niining klase nga langyaw, dili gyud ko magpanuko sa pagsukol ug maninguha pa ko nga ma-deport kini balik sa ilang nasud.

* * *

Aduna nay bag-ong engineering district ang lalawigan sa Sugbo nga modumala sa mga proyektong ipaagi sa Department of Public Works and Highways (DPWH) nga maoy modumala sa mga proyekto sa siksto distrito ug sa lone congressional district sa Lapulapu.

Kini mao ang sixth engineering district nga maglangkob sa ika-unom nga distrito ug sa distrito sa Lapulapu nahimo kini pinaagi sa paninguha ni Kongresista Luigi Quisumbing sa ika-unom nga distrito.

Sa ato pa, ubos niining bag-ong distrito ang dakbayan sa Mandaue, Consolacion ug Cordova, ug dakbayan sa Lapulapu.

Sa naandan, apil unta sa maong engineering district ang ika-upat nga distrito, apan sa maong bag-ong distrito, matutokan na sa district engineer ang mga pagsuperbisar sa mga proyektong inprastraktura ubos sa maong hurisdiksiyon.

 Maayo kining gihimo ni Kongresista Quisumbing gi-redistrict ang naandan nga engineering district nga apil pa ang ika-upat nga distrito.

Kay sa kagamay na lamang sa hurisdiksiyon, matutokan sa district engineer ang mga proyekto ug sa ingon, malikayan na ang substandard nga mga proyektong inprastraktura.

Nahibaw-an usab gikan ni Quisumbing nga ang maong engineering district pagadumalahon sa usa ka Mandauehanon nga atua pa madestino sa DPWH sa Manila. Si Engr. Jun Suico maoy himuong OIC district engineer sa maong bag-o nga engineering district.

* * *

Usa usab sa gitinguha ni Quisumbing nga maaprobahan ang bag-ong pamaagi sa pagpang-apud-apod sa Priority Development Assistance Fund (PDAF) nga himuon na lang patas.

Uyon usab ako sa pamaagi paghimong patas sa PDAF tungod kay adunay mga distrito nga nabiyaan gyud intawon sa kalambuan tungod sa kagamay sa PDAF nga gihatag gikan sa kagamhanang nasyonal.

Kini usab nga pagpanghatag og PDAF gipamolitika sa miaging mga administrasyon mao nga adunay mga distrito nga nabiyaan.

Aduna hinuoy mga distrito nga ang kongresista hilabihan katapulan, dili gani makamao nga moduso og proposal sa ilang mga proyekto didto sa kagamhanang nasyonal mao nga dili mapahatan og pundo nga masulod sa tinuig nga pundo sa nasud.

Apan adunay mga distrito usab nga ang kongresista “maro” na kaayo. Bisan sa katang-an na sa kongresista, ang distrito nagkuyamang gihapon sa kagamay sa mga proyektong inprastraktura nga nangahimo tungod kay ang PDAF napunta sa iyang bulsa.

Adunay proyektong karsada nga buboan unta og pundo, apan tungod kay kurakuton sa kongresista ang dako nga pahat o porsiyento niini, ang karsada molagbas ra gyud intawon og pila ka metros, kasagaran sa usa lang ka lane nga maagigan lamang og usa ka sakyanan, dili kasugatan.

Daghan pang farm-to-market roads nga dili sementado tungod sa kurakot nga kongresista.

Pero, niining paagiha nga himuong nang patas ang pundo alang sa distrito, dili na maka-ingon ang usa ka kongresista nga wala koy pundo kay dili ko administrasyon.

Sugod sa 2011 ang pagpatuman sa paghimong patas nga pangpang-apud-apod sa pundo alang sa mga proyektong inprastraktura.

Sa ato pa, sunod tuig, dili na maka-alibi ang mga kongresista kun wala kini nahimong proyekto sa iyang distrito.