Walter B. Knight
Niadtong unang panahon nagmando sa Persia ang usa ka maalamon ug buotang hari. Buot niyang sutaon ug sination ang kalisud nga natagamtaman sa iyang katawhan. Adunay mga higayon nga siya magtakuban ingon nga mamumuo o dili ba isul-ob niya ang sapot sa usa ka makililimos. Wala’y ni bisan kinsa ang nakamatikod nga siya diay ang ilang hari.
Usa ka higayon niana, iyang giduaw ang usa ka kabus ug timawang linalang nga nanimuyo sa usa ka mangiob nga langob, nakigsalo siya sa kabus niining pagkaon. Nakigkukabildo siya ginamit ang mga maayong mga pulong. Dayon mibiya siya ug milakaw. Wala damtig dugay nahibalik siya ug sa mga tataw nga mga pulong iya kining gitug-anan sa matuod nga siya diay mao ang hari.
Natingala ang maong tawo sa maong kamatuoran. Ang hari nagpaabot nga ang maong tawo mangayo kaniya og pabor o kaha gasa. Apan ang maong tawo wala gayud mangayo og bisan unsa. Ang maong tawo miingon: “Kamahalan, gibiyaan mo ang harianon mong palasyo aron lamang makigsalo ug makig-uban kanako ning mangiob nga langub. Kalipay ang imong gidala kanako. Tinuod gihatag mo ang imong mga maanindot ug mga maluhong gasa alang sa uban apan kanako, gipaambit mo sa wala’y pagtihik ang imong kaugalingon.”
Ug pagatawgon siya og Emanuel nga sa ato pa ang Dios uban kanato. Ning Domingoha atong pamalandongan ang tabunok nga kahulogan sa misteryo sa pagpakatawo sa atong Ginoo alang kanato. Si Jose ang manggihatagong mipaambit sa iyang kaugalingong kinabuhi aron lamang maatiman ug maalimahan ang bata nga ipahimugso gikan sa sabakan ni Maria bisan pa man kun kini dili iya. Si Jesus ang manggihatagong mipaambit sa iyang kaugalingong pagka-Dios aron kitang mga tawo ang makaambit usab sa iyang Pagka-Dios ingon nga siya nahimong tawo nga nipuyo uban kanato. Sama sa atong sugilanon ang hari nahimong nakahikap sa kinabuhi sa uban dili tungod sa iyang bahandi kundili tungod sa iyang kaugalingong kamanggihatagon diha sa pagpaambit uban sa yanong tawo sa iyang panahon.
Ang tinuoray nga pagbinayloay og mga gasa wala lang diha sa mga materyal nga mga butang kundili diha sa paghimo sa tagsa-tagsa ka mga kaugalingon ingon nga gasa ug paglaom alang sa ubang nagkinahanglan.