Daygon nga dayon-dayon

Andam na ba gayud makigbangga si Mayor Mike Rama kang Kongresista Tomas Osmeña?

Sa akong pangagpas pigado baya si Rama niining ilang away karon ni Osmeña.

Kita nasayud nga hapit tanang mga konsehal sa Cebu city mga lunod-patay nga dumadapig ni Tomas ug mahimo nilang lisud-lisuron ang Rama administration pinaagi sa pagpugong sa budget proposal sa mayor. (Atong tan-awon kun unsay labok sa mga konsehal niining gipangayo’ng P4.4 bilyones nga budget sa Cebu city sa 2011.)

Kun magkalisud na ang siyudad tungod sa kakuwang sa pundo sayon na kaayo ang pag-recall kang Mayor Rama karong Hulyo, sunod tuig.

Ang moatbang unya kang Mayor Rama nianang maong recall election posible nga si Kong. Tomas Osmeña mismo, ang iyang asawa si Margot, o’ si bisan kinsa nga kasaligan ni Tomas.

Anha na diha makita ang katag kun si kinsa gayud ang paluyuhan sa taga-Cebu city.

* * *

Kinahanglan nga badlungon o kaha dakpon na kining mga manaygon kun magpakilimos sa kadalanan.

Maluoy unta ako niining maong mga tawo, labi na sa kabataan, nga mangayo og pinaskohan apan supak kini sa balaud ug nahadlok ako nga tingali’g mabangga-an sila sa mga sakyanan sa kadalanan.

Sa laing bahin, kun daku ang ilang makita niining pagpanaygon kun pagpakilimos ila na kining himoon nga “propesyon.”

Kini maoy daygon nga dayon-dayon.

* * *

Sigun sa gipaabut, nidaug gayud ang mga kandidato sa Sangguniang Kabataan (SK) nga gipaluyuhan sa mga dagkung politiko. Grabe usab ang vote-buying.

Nataptan na gayud sa kagaw sa politika ang Sangguniang Kabataan (SK).

Tungod niini, nausab ang akong baruganan kalabut sa maong kahugpungan ug buot na ako karon nga papason na kining SK.

* * *

Nagpaluyo ako sa tumong ug tuyo ni Pres. Aquino nga paglimpyo sa atong gobiyerno sa mga kurakot.

Uyon usab ako sa pag-imbestigar sa mga opisyal sa gobiyerno nga nangawkaw sa salapi sa lungsod niadtong nanglabay’ng mga administrasyon.

Apan dili ako uyon nga sawayon sa presidente ang desisyon sa atong Korte Suprema bisan kun nagtuo siya nga sayop kini.

Kun magpadayon si P-Noy niini nahadlok ako nga mawala ang pagsalig sa katawhan sa atong Korte Suprema ug mohari na unya ang anarchy.

* * *

Laing pag-apil-apil ni Pres. Aquino mao ang pagsugo niya sa Department of Justice nga pabuhian ang mga sakop sa “Morong 43” nga gidakop sa mga sakop sa militar tungod sa pagduda nga kini sila mga sakop sa New People’s Army (NPA).

Ang nakaparat kay ikiha na hinoon niining mga dinakpan ang militar tungod sa pagdakop ug pagpriso kanila.

Nganong wala man lang paabuta ni P-Noy ang hukom sa korte kalabut niini? Tinuod ba’ng anaay mga komunista sa iyang gabinete karon?

Kinahanglan nga mahinumduman sa Malacañang nga “we are a nation of laws not of men.”

* * *

Usa ka tawo nga angayang pasalamatan tungod sa iyang nahimo alang sa Sugbo mao si Engr. Nilo Pamaylaon.

Bag-o palang siyang ni-retire sa DPWH. Siya ang Project Manager sa Cebu South Coastal Road apil na ang pagtukod sa labing unang tunnel sa Kabisay-an ug Mindanao.

Siya usab ang Project Manager sa Cebu North Coastal Road Project apil na ang pagtukod sa taytayan sa Cansaga, Consolacion nga nagsumpay sa dakbayan sa Mandaue ug Lilo-an.

Kining maong mga world-class projects angayang ipasigarbo natong mga Sugbuanon.

Hinaut pa’ng magpadayon siya pagsilbi sa Sugbo bisan sa iyang pagka-private citizen kay ang atong nasud nagkinahanglan og sama kaniya moalagad.

Isip Regional Development Council-Infrastructure Development Committee (RDC-IDC) chairman, mapasalamaton ug mapasigarbuhon kaayo ako kang Engr. Nilo Pamaylaon!

* * *

Akong mga panghinaut og Maayong Pasko sa akong mga kabanay, kahigalaan ug sa tanang mga tawo.

Hinaut nga hatagan kita og maayong panglawas aron makapadayon kita pagdayeg Kaniya hangtud sa sunod Niyang kasumaran sa adlaw’ng natawhan.

Advance Merry Christmas!

* * *

Email: [email protected]