Lain pang Vizconde ug Webb

Daan nang nagduda ang publiko nga mopabor gyud ang Korte Suprema sa grupo sa mga akusado human nga gisang-at sa labing taas nga hukom ang kontrobersyal nga kaso nga nahitabo 19 ka tuig na ang nakalabay. Sakto ang katawhan tungod kay sa kaulahian, nidapig gyud sa grupo nilang Hubert Webb ang desisyon sa Korte Suprema. Human sa 15 ka tuig, 3 ka buwan ug 15 ka adlaw sa New Bilibid Prison, nahatagan og kagawasan ang giisip nga akusado sa maong kontrobersyal nga kaso. Managlahi man ang reaksyon sa duha ka kampo ug mismong sa katawhan, usa lang ang buot ipasabot niining tanan—pildi ang sistema sa hustisya sa atong nasud.

Kinse ka tuig nga pagserbisyo sa sala nga wa’ nimo mahimo, kana kung basehan ang desisyon sa labing taas nga hukmanan, dili sayon kun imong tan-awon. Di’ lalim nga ihikaw sa usa ka tawo ang normal nga pagpuyo tungod sa sala nga wa’ nimo mahimo. Mahimo sigurong mogawas sa atong huna-huna ang mga nagkadaiyang opinyon sa unsang matang sa pagkatawo ang mga akusado o posibleng nagduda ‘ta sa ilang pagkatawo. Apan mahimo natong ipagawas ang atong mga opinyon apan wa’y makapa-usab sa kamatuoran nga inosente ang maong mga akusado base sa desisyon sa labing taas nga hukmanan ug nga halos duha ka dekada nga pagpuyo kanila su’d sa selda usa ka matang sa inhustisya nga di’ na unta mahitabo sa uban pang mga binilanggo karon.

Ang tinuod mao, daghan pa ang mga sama ni Webb nga anaa karon su’d sa bilangguan ug nagserbisyo sa silot sa usa ka krimen nga wa’ niya mahimo. Si Hubert Webb na mismo ang nitug-an sa media nga daghan siya og mga naka-ila su’d sa prisohan nga susama sa iyang kasinatian ang giantos. Luyo sa ilang ka inosente sa krimen, daghan og mga priso nga gihikawan sa maayong mga abogado, gasto aron sa pagpadagan sa kaso ug ang pagkombensir sa mga lig-on nga testigo. Angayan natong tan-awon nga kung naabtan ang grupo ni Webb og 15 ka tuig sa bilangguan nga aduna silay salapi nga ikagasto aron sa pagpadagan sa kaso, unsa pa kaha ang sitwasyon sa daghang mga kabus nga nalambigit sa mga kaso apan dakong inosente sa krimen.

Sunod tuig maisip nga expired na ang kaso sa Vizconde tungod kay mag-baynte na ni katuig. Duha lang ka butang ang buot ipasabot niini, mahimong dili na makasuhan ang duha pa ka akusadong gawasnon gihapon hangtud karon nga silang Joey Filart ug Artemio Ventura. Laing punto mao nga balik sa numero uno ang padayong pagpangita og hustisya ni Lauro Vizconde sa pagkamatay sa iyang duha ka anak ug asawa. Ang sugilanon ni Vizconde, di’ ‘sab bag-o sa nasud tungod kay daghan ang sama niya nga nagtinguha nga makab-ot ang hustisya apan biktima pa hinuon sa sirkumstansya. Kung imong tan-awon, mas aduna pay gahum si Vizconde sa paggukod sa mga akusado tungod kay may igo siyang suporta ug kuwarta aron sa pagpadagan sa kaso. Apan mag-unsa nalang ang mga pamilya nga way igong salapi ug suporta aron ipadayon ang ilang kawsa alang sa hustisya.

Wa’y nadaoy ug wa’y napildi atol niining labing bag-ong pagpakli sa kasaysayan sa kontrobersyal nga Vizconde massacre case. Ang dakong pildi dinhi ang atong sistema sa hustisya. Sa atong nasud, mahimo ra diay kaayo ang magpahamtang og silot ug mopabilanggo sa usa ka tawo su’d sa daghang katuigan apan sa kaulahian, inosente diay sa krimen ang akusado. Sa atong nasud, mahimo ra diay kaayo nga ang hustisya nga abi nimo og naangkon na, subli diay ihikaw nimo tungod kay sayop diay ang nahaunang desisyon. Kinahanglan nga tan-awon sa gobyerno ang mga leksyon nga atong makuha gikan sa kaso sa Vizconde tungod kay ang kinabuhi di’ mahimong mabiktima sa inhustisya.

* * *

Email: [email protected] or [email protected]