Giabsuwelto sa Korte Suprema ang mga konbiktado sa Vizconde masaker nga sila si Hubert Webb, Antonio Lejano, Michael Gatchalian, Miguel Rodriguez, Hospicio Fernandez, Peter Estrada ug kanhi polis Gerardo Biong. Kini human mapakyas ang prosecution sa pagpamatood sa pinakataas nga hukmanan nga sad-an sa way lama sa pagduda ang mga konbiktado.
Wa maapil sa hukom sila si Artemio Ventura ug Joey Filart kinsa hangtod karon wa pa gyod madakpi sa kapolisan ug wa pa usab mataral sa hukmanan.
Ang Korte Suprema sa hukom nga gisuwat ni Associate Justice Roberto Abad ug gipaboran nila ni Justices Conchita Carpio-Morales, Diosdado Peralta, Lucas Bersamin, Jose Mendoza, Jose Perez ug Ma. Lourdes Sereno mibaliktad sa hukom ni maghuhukom Amelita Tolentino sa Paranaque nga karon usa na ka Justice sa Court of Appeals nga nagkonbikto kang Hubert Webb ug mga kaubanan sa kasong pagpanglugos ug pagpatay ni Carmela Vizconde ug pagpatay nila ni Estrellita ug Jennifer Vizconde.
Ang hukom ni maghuhukom Tolentino gipalig-on kini sa Court of Appeals tungod kay positibo nga gitudlo sa star witness nga si Jessica Alfaro ang mga konbiktado nga maoy mihimo sa krimin. Tungod sa maong hukom ang mga konbiktado napriso sulod sa kinse ka tuig ug kaniadtong Martes gipabuhian sa Korte Suprema tungod kay wa mapamatod-i nga sila sad-an.
Ang Korte Suprema sa iyang hukom miingon nga usa ka dakong sayop ang pagpapriso sa usa ka tawo nga adunay nakabitay nga pagduda. Ang pinakataas nga hukmanan mitoo sa depensa ni Webb nga didto siya sa Amerika sa dihang nahitabo ang krimin.
Apan ang upat sa kinse ka mga justices sa Korte Suprema nga gilangkoban nila ni Chief Justice Renato Corona, Associate justices Martin Villarama, Teresita Leonardo De Castro ug Arturo Brion wa muoyon sa hukom samtang ang laing upat nga sila si Associate justices Antonio Carpio, Mariano del Castillo, Eduardo Nachura ug Presbitero Velasco wa moapil sa paghimo sa hukom.
Tungod sa hukom sa Korte Suprema sangko sa langit ang kalipay ni Hubert Webb ug mga kaubanan samtang sangko sa langit usab ang kaguol ni Mr. Lauro Vizconde ang padre de pamilia sa mga biktima
Karon nga miingon ang Korte Suprema nga dili si Hubert Webb ug mga kaubanan ang naghimo sa krimin, kinsa man diay ang naghimo niini? Magpaabot na lang upod ta ani kinsa ang sunod nga signiton sa NBI ug ipaila-ila nga maoy naghimo sa krimin.