Congratulations Southwestern University

Akong pahalipayan ang Southwestern University tungod sa nakab-ot niining pasidungog gikan sa Commission on Higher Education ug Dangerous Drugs Board isip BEST Higher Education Institution implementing Drug Education, Prevention and Control Program sa Rehiyon VII ug sa kinatibuk-ang rehiyon sa Visayas.

Isip mananaug dinhi sa rehiyon VII nadawat sa nahisgutang tunghaan ang 20,000.00 ug Certificate of Recognition. Unya isip mananaug sa kinatibuk-ang Visayas nadawat usab niini ang cash nga premyo nga 75,000.00 ka pesos ug Plaque of Recognition.

Ang awarding ceremony gipahigayon didto sa CHED auditorium sa may C.P. Garcia Avenue U.P. Diliman, Quezon City kaniadtong Martes, Decembre 7, 2010.  

Kining inyong igsoon mapaubsanong mopahibalo kaninyo nga maoy gitahasan sa Southwestern University sa pagdawat sa iyang pasidungog nga naangkon. Kay sulogoon man lang tawon ko wa ko makabalibad.

Ambot wa ko masayod kun nganong sa kadaghang opisyal sa Universidad ako pa ang gitahasan sa pagdawat sa pasidungog nga unta mayukmok man lang tawon ko. Seguro giila sa Universidad ang natampo sa NEWGAD o New Generation Against Drug and Corruption nga aktibo kaayong nagkampanya batok sa suliran sa ginadiling drugas ug pagpangawkaw unya kay ako man ang Chairman sa maong organisasyon maong ako ang iyang gisugo.

Si Dr. Elsa Suralta ang among presidente sa University miingon nga ang 95,000.00 ka pesos nga ganting nadaug ibutang sa usa ka trust fund aron maoy gamiton alang sa dugang pang mga anti drug program sa organisasyon ug sa Universidad.

Sa pagka tinood ang Southwestern University ug ang among organisasyon wa mangandoy nga mamahimong awardee sa iyang kampanya batok sa ginadiling drugas. Ang bugtong namong tingoha mao ra gayod ang pagpakabana ug pagmugna og usa ka drug ug corrupt free nga sociedad. Maoy dako namong kalipay ang pagtan-aw sa matag banay sa tibook nasud nga walay sakop nga adik o nagumon sa ginadiling drugas.