Lantugi sa RH bill
Ang labing awahi nga survey sa Pulse Asia nagpakita nga 69-porsiyento sa mga respondents uyon sa Reproductive Health Bill. Kini taliwa sa padayong pagpangugat sa mga Obispo ug Kaparian batok sa pagpasar sa balaudnon nga karon sentro sa init nga debate didto sa Kongreso.
Human mabisto nga mas daghan ang mga tawo nga wala motuo sa baruganan sa simbahan sa RH bill, usa ka opisyal sa Catholic Bishops Conference of the Philippines ang mihimo sa panawagan nga angayang hunongon na ang paghimo og mga survey maylabot sa kontrobersiyal nga balaudnon.
Si Padre Melvin Castro, executive director sa CBCP-Episcopal Commission on Family and Life, miingon nga angayang hunongon na ang surveys. Kun dili man iyang gidemanda nga ipakita una sa publiko ang mga pangutana sa survey sa dili pa kini iapud-apod ngadto sa mga mamahimong respondents.
Matud ni Castro nga nagtuo sila nga buot impluwensiyahan sa survey ang mga magbabalaud nga nagpadayon pa sa pagtuki sa balaudnon labi pa nga daghan sa mga tawo ang uyon niini.
Unsa may buot ipasabot sa CBCP nga dili nalang paminawon sa mga kongresista ang sentimento sa katawhan? Unsa may kapuslanan nga atong gipili ang mga kongresista isip atong mga representante didto sa Kongreso kun dili man diay kita buot nga maminaw sila sa atong tingog?
* * *
Si Dr. Rene Joseph Bullecer sa Human Life International, usa ka Non-Government Organization nga hugtanon sab nga nisupak sa RH bill, miingon nga dili siya motuo sa survey.
Apan dihang akong gipangutana kun tanan ba nga matang sa survey dili gyud siya motuo, matud niya nga depende sa matang niini. Unsa man iyang buot ipasabot depende kun pabor sa ila ang resulta sa survey?
Ang bug-at nga rason ni Bullecer nganong supak sila sa RH bill mao nga kinopya kuno ang maong balaud gikan sa Amerika. Gitumong kuno kini aron pag-advance sa interest sa Amerika ug sa European Union.
Maniobra kuno ang maong balaudnon aron makaangkon sa hingpit nga pagkontrolar sa atong politika ug ekonomiya ang Amerika. Dili nalang ko makiglalis niining maong punto kay labihan na man gyud ka lagpas.
Usa ray pangutana nako ni Bullecer ug sa ubang mga supak sa RH bill. Unsa may mga disbintaha nga maangkon sa katawhan kun ipatuman ang maong balaud?
Way bisan usa nga nahatag nako si Bullecer dihang akong nahinabi sa tulomanong Lintunganay sa dyLA. Kun ako’y sumbalikon niya sa pagpangutana unsay kaayohan kun ipatuman ang maong balaud?
Dili paigo ang usa ka lindog aron iladlad ang mga bintaha niini. Apan tugoti nga maghisgot ko sa pipila ka mga bintaha nga akong nakit-an.
Importante nga ma-edukar sa hustong pagplano sa pamilya ang katawhan aron sa ingon malikayan ang mamahimong iresponsabli nga ginikanan. Kun dunay hustong kahibawo sa pagplano sa pamilya ang direktang epekto niini mao ang pagminus sa mga “unwanted pregnancy” nga maoy hinungdan sa daghang kaso sa abortion ug sa mga bata nga gibiyaan lang daplin sa dalan.
Apan ang mas maluntarong epekto mao ang inanay nga pagkahaw-as sa kalisod sa matag kabus nga pamilya. Nagtuo ko nga bisan unsa ka kakabus sa banay kun duna lay pagpaningkamot ug responsabli ang mga haligi niini way rason aron dili moasenso.
* * *
- Latest
- Trending
