Ang mga badlungon

Kaniadtong miaging adlaw gisuspenso sa iyang trabaho balig napulo ka adlaw si PO2 Rodelo Pilapil Jr. ang police nga nadistino sa Medellin Police Station. Kun nakahinumdom pa mo, si PO2 Rodelo Pilapil Jr. naghubo sa tanan niyang tapot sa lawas samtang misakay og barko padulong sa Isabel Leyte tungod sa grabing ka hubog kaniadtong Oktobre 6 ning tuiga. Nagkawil-kawil tawon ang armas sa police samtang nagwara-wara usab sa iyang armas sa taas.

Nahuman na usab ang imbestigasyon nga gihimo sa provincial police office batok kang Supt. Anthony Bagarinao ang hepe sa Naga Police Station nga gipasanginlan nga mi-release sa ilang nasakmit nga coco lumber katumbas sa babaye nga gipalingaw kaniya ug kahon sa mga beer nga gipainom kaniya.

Gireklamo usab sa usa ka tinun-an sa elementarya sa Gibuangan Central School sa lungsod sa Barili ang iyang magtutudlo nga bayot tungod sa pagmolistiya kaniya kaniadtong Oktobre 7 ning tuiga. Didto sa kawayanan gipaum-om sa bayot nga magtutudlo ang iyang tinun-an nga minor de edad.

Kaniadtong Martes gipadakop usab sa iyang asawa ang bana nga salbahis tungod sa paglugos niini sa iyang kaugalingong anak nga minor de edad didto gihapon sa lungsod sa Barili. Mao ni sila ang pipila lamang ka mga badlungon sa atong katilingban. Porbida mag-unsa kaha ang atong katilingban og magdaghan ni sila.  

* * *

Nakakita na gyod og katapat si Joavan Fernandez. Gibuak ni Greco Sanchez anak sa bise gobernador ang bildo sa bintana sa sakyanan ni Joavan tungod kay wa kini mobayad sa iyang utang nga 20 mil ka pesos ngadto kaniya. Nahitabo kini sa dihang nag-abot ang duruha. Ang duha pulos mga adik basi sa mga balita. Nindot gyod unta to og nagsumbagay o ba kaha nagpinusilay ang duha aron makita kinsa gyoy mas ngilngig sa duha ka mga adik ug kun kinsa ang mas maayong modepensa nga amahan.