EDITORYAL - Gasto sa barangay bukas alang sa publiko

Plastado na ang programa sa kagamhanan nga matag buhatan sa local nga kagamhanan mopahibawo na sa publiko sa ilang proyekto ilabi na sa ilang gigahing salapi nga gigasto niini.

Unya matud pa ni Regional Director Pedro Noval Jr. sa DILG nga puwede na kunong makakuwestion si kinsa mang molupyo o pribadong tawo nga diskontento sa kantidad sa proyekto.

Kun tinuod kini, dinhi makita   ang tinuod nga kasihag (transparency) sa mga pamaagi sa kagamhanan karon.

Kay ang tinuod, sa tanang transaksyon sa  gobyerno, ang pobre nga si Juan dela Cruz igo lang gyud sa paghinuktok kun madungog na niini ang mga anomalusong transakyon sa kagamhanan.

Wala kini katungod nga mosukitsukit sa mga kadagkoan sa kagamhanan tungod kay salikwaot alang kanila.

Apan karon, matud pa ni Director Noval nga mahimo na kaayo , ug kun moreklamo ang kinsa mang opisyal sa kagamhanan, diha-diha angay kining isumbong ngadto sa buhatan sa Ombudsman.

Ang napanid-an sa tanan, bisan sa taga media, nga sakaon kaayo alang sa yanong molupyo ang pagsusi-susi sa mga kalihukan sa   kagamhanan bisan diha sa barangay.

Karon kun matinuod nga mao na kini binag-ong pamaagi sa kagamhanan, nga makahimo na ang mga ordinaryong molupyo sa pagkuwestion sa mga transaksyon sa barangay, lungsod, siyudad ug lalawigan, gituohan nga maglikay na ang mga opisyal sa kagamhanan sa pagmugna og binuang nga panguwarta.

Pero dihang gipangutana si Director Noval kun usa ba kini ka paagi nga mawagtang sa hingpit ang korapsyon, igo ra gyud siyang milingo-lingo, nga nagpasabot lisud kaayong kontrolahon ang korapsyon.

Kini tungod tingale kay nahimong dugo na nga naglatay sa kaugatan sa tawo ang pagka-korapso.

Si kanhi Presidente Marcos kaniadto daghan kaayong nagdumot, kay gawas sa iyang pagkaabtik sa panguwarta, siya ang unang nakapabaniog sa P86 milyones nga anomaliya sa departamento sa obras publikas.

Gani kasagaran sa nasilotan sa ilang tibuok kinabuhi, taga Sugbo ug ang ubang napahamtangan og silot bag-o lang nakabsan sa ilang gininhawa sa prisohan.

Apan karon migrabi kakusog ang korapsyon apan maihap lang sa tudlo kun pila ray napriso nga korapso.