Abuso batok kabataan

Nindot ang awhag sa kadagkoan sa Department of Education (DepEd) nga kun dunay Violence Against Children diha sa mga tunghaan, ilabi na kun ang naghimo niini mga magtutudlo, ireport dayon kanila.

Si Assistant superintendent Salustiano Jimenez sa DepEd Cebu City district mipasalig nga aksyonan dayon nila kun duna sila'y madawat nga report sa pagpangabuso batok sa kabataan.

Mitambong ko og kalihukan kagahapon nga naghisgut kabahin sa Violence Against Children ug daghan kaayo ang angay'ng mahibaw-an sa kadaghanan.

Usahay gud wala ka lang masayud nga sa subra nimo nga pagtudlo og disiplina sa imong mga anak, o kaha sa mga tinun-an ninyo diha sa mga tunghaan, nakalapas na kamo sa katungod sa mga bata.

Sagad gayud nga kalapasan nga mahimo basi sa pagtuon nga gipasiugdahan sa United Nations International Children Economic Fund (Unicef) mao ang verbal abuse.

Sama sa paghimo og grabe na kaayo nga kasaba ngadto sa atong mga anak sama sa paghingan kanila nga "Bobo, bulok, bugo, tapolan, salbahis, yawa, daku'g kaon, walay pulos nga pagkabata, ug daghan pa.

Tungod kay ang maong mga pulong sakit man kaayo pamation, ilabi na kun isulti kini atubangan sa kadaghanan, ang mga bata apektado kaayo ug usahay sila maghinuktok.

Resulta, wala na silay maayong paghuna-huna didto sa tunghaan. Ilabi na kun ang mga bata makabantay nga nag-away ang ilang Mama ug Papa, mosamot nga sila maghinuktok na didto sa ilang klase.

Unsa may tukma nga buhaton? Matud pa sa mga psychologist nga am-aman lang ang mga bata ug sigihan sila pagmaymay aron sa ngadto-ngadto masilsil sa ilang pangisip kun unsay maayo.

Pananglit ang akong singko-anyos nga bata gusto g'yud kaayo siya nga magduwa sa internet ginamit ang akong laptop. Apan karon, akong gipasabot nga dili makaayo kaniya kun magsige siya'g duwa sa internet.

Sa hinay nako nga pagpasabot, miuyon ra siya nga ang pagduwa og internet himoon na lang niya sa gabii sa Biyernes ug Sabado, inigka-Domingo dili na kay aron andam siya inigka-ugma sa klase. Ang pagtuon nga gihimo sa Unicef naglakip sa mga tunghaan dinhi sa dakbayan sa Sugbo.

Dunay usa ka tinun-an nga gipangutana kabahin sa Violence Against Children nga ilang nasinati.

Misaysay kini nga dihay higayon nga nakasala ang usa nila ka classmate. Naunsa ba nga sila mang tanan ang gipatawag sa principal ug gipatay-patay'g kasaba.

Wala hinoon ilha sa report kun diin kini nga tunghaan kay aron dili usab mauwawan ang hingtungdan. Ang ilang tinguha nga makorehean lang ang dili maayo, ug dili aron nga masilotan kadtong principal. Sa uban g'yud nga tunghaan sama didto sa Masbate, dunay mga sexual abuses nga gihimo batok sa mga tinun-ang babaye.

Mao kana ang dakung sayup. Kamong mga tinun-an kun masayud kamo nga dunay mga maestro nga nanguyab og mga estudyante, ireport kana ninyo sa DepEd district office, ilabi na og manghulga.

Ang ubang mga tinun-an mahadlok kay dunay mga maestro nga manghulga nga hatagan niya'g gamay'ng grado kadtong mga tinun-an nga dili mosugot niya. Paita!

Kun sa panultihon pa "Hangyo-lobo" man. Pagbaton mo'g kauwaw uy. Kun dunay ingon niini, diri tug-an nako kay ayohon nato'g makmak kining mga walay uwaw nga maestro.