Pagpakabana sa kalikopan

Nag-una sa 20 ka mga barangay sa South District sa dakbayan sa Sugbo ang suliran sa kalikopan sama sa suliran sa paglabay sa ilang basura. Sa gihimong pagtoon sa mga tinun-an nga nagkuha sa kursong Political Science sa Southwestern University nagpakita nga sa 20 ka mga barangay, 11 niini ang nakasinati sa maong suliran. Ang 11 ka mga barangay mao kining mosunod: Kinasang-an, Inayawan, Poblacion Pardo, Cogon, Basak San Nicolas, Sapangdaku, Guadalupe, Tisa, Labangon, Basak Pardo ug Bulacao.

Ang suliran sa kalikopan gisundan kini sa suliran sa kahapsay ug kalinaw nga gilangkoban sa ginadili nga drugas, pagpanulis ug pagpanglabni ug panagbangi sa mga gangs. Unom ka mga barangay ang miangkon nga ang suliran sa ginadiling drugas ang nagsunod nilang suliran. Ang unom ka mga barangay mao kining mosunod: Kinasang-an, Punta Princessa, Sapangdaku, Tisa, Labangon ug Bonbon.

Samtang laing lima ka mga barangay ang miangkon nga maoy nagsunod nilang suliran ang mga tulis ug pagpanglabni. Ang maong mga barangay mao kining mosunod: Inayawan, Kalunasan, Basak San Nicolas, Basak Pardo ug Pasil.

Ikatulo sa mga suliran nga mao upod ang nasinati sa 20 ka mga barangay sa South District mao ang inprastraktura sama sa drainage. Ang suliran sa mga out of school youth maoy pinakaiwit nga suliran sa Barangay Sapangdaku ug Mambaling samtang ang suliran sa panglawas ang nangiwit nga suliran sa Barangay Labangon. Wa usab kaayo masinati sa Barangay Quiot ang suliran sa gang war.

Ang pagtoon nga gihimo gituyo aron masayran gikan sa 20 ka mga barangay sa South District sa dakbayan sa Sugbo kun nasayod ba ang mga opisyal sa suliran sa ilang barangay ug ila ba kining gihimoan og pagtagad.

Ang pagtoon gihimo sa mga graduating students sa kursong Political Science sa Southwestern University nga sila si Prince John Aurelle Barriatos, Ace Dionaldo, Amelita Labajo, Angelique Marcojos ug Jasmin Suico.      

Ang kalikopan di nato kapsangan hinoon kaniya kita magpakabana. Kay nasayran man sa 20 ka mga barangay sa South District sa dakbayan sa Sugbo ang suliran nga mihulga sa atong kalikopan hinaut nga sila niini magpakabana ug dili magmika.