'Amazing Philippines'

“Amazing Philippines” ito na lang sana

Ang ipalit natin sa “Piipinas Kay Ganda”;

At sa “Wow Philippnes” – ngayon ay naluma

Pagka’t ang gobyerno natin ay bago na!

Katagang “amazing” magandang pang-akit

Sa lahat ng taong malayo’t malapit;

Kapamilya at Kapuso at Kapatid –

“Amazing Philippines” madaling masambit!

Dahil sa bago na ang administrasyon

Saka burado na ang slogan noon –

Ang baguhin ito ay napapanahon

Para original nitong lider ngayon!

Tutulong kay Noynoy ang ating idolo

Na si Manny Pacquiao sa ating turismo;

Kung silang dalawa magtutulong dito –

Tuloy ang pag-unlad nating Pilipino!

Dahil sa luma na itong “Wow Phiiippines”

Dapat mawala na sa bagong rehimen;

Maganda nga ito pero mapapansin

Ang pamana nito’y mantsa sa damdamin!

Mga mamamayang kaisa’t kalaban

Ipagkakapuri ang bagong slogan;

Maraming “amazing” dito sa ‘ting bayan

Kaya matutuwa turistang dayuhan!

Pagkaing masarap, magandang tanawin;

Makikita ritong talagang amazing;

Ang mga turistang sa bansa’y darating –

Sa airport pa lamang ngingiti sa atin!

Travel Advisory di dapat humadlang

Sa mga uuwi nating kababayan

Ang mga turistang maglilibang lamang

Ay samahan natin sa kapayapaan!

Dahil bago na nga pang-akit sa tourists

Pagbalik sa abroad sila’y magsusulit:

“Sa Philippines pala masaya’t tahimik

Talagang amazing saanman sumapit!”