Sukol nang Gwen

Ambot kun gusto ba lang magpakita nga wa siya hingpit nga magmika sa katungdanan, o langayan ba lang gyud ang ilang buhatan, sa kataposan gimando nang Ombudsman Merceditas Gutierrez ang pagpasaka og mga kasong kriminal ug administratiba sa mga opisyal sa Kapitolyo sa Sugbo tungod sa pagpalit nila og yuta ilawom sa dagat.

Apan karon na lang nilihok si Gutierrez human niya yak-i sud sa lima ka buwan ang rekomendasyon sa Visayas Ombudsman pagkiha nilang Gobernador Gwendolyn Garcia ug kaubanan. Kabahin ba ni sa iyang panagang sa duha ka impeachment com-plaints nga gipasaka batok niya? O nagsugod na gyud pagpalayo sa mga alyado ni kanhi presidente Gloria Arroyo?

* * *

Niadto pa diay’ng Hunyo ning tuiga nga nahingpit ang imbestigasyon sa pagbayad ni Garcia og dul-an sa P100 milyones sa luna sa mga Balili sa Tinaan, Naga City nga naglakip sa kapin sa 80,000 square meters nga luna ilawom sa dagat ug kapin sa 14,000 square meters nga katunggan.

Ang nakaplagan ni Graft Investigator Roderick Blazo nga naalkanse ang Sugbuanong mga magbubuhis og P78.6 milyones sa maong transaksiyon gidasonan nilang Ombudsman Director Carla Juris Narvios-Tanco, Assistant Ombudsman Virginia Palanca-Santiago ug Deputy Ombudsman Pelagio Apostol. Ang ilang lakang nisukwahi sa pasangil nga under-the-bunal silang Garcia. Apan di katabang sa kaligdong ni Gutierrez.

* * *

Niangkon na si Garcia nga nasayop siya sa pagsud sa transaksiyon. Iyang gibasol si kanhi provincial board member Juan Bolo nga maoy nagsige og apura niya. Apan si Bolo sa iyang bahin nisumbalik nga si Garcia ang tinuod nga utok ug nga igo lang siyang nituman sa sugo sa gobernadora pagpadali sa transaksiyon.

Ang nisunod nga mga lakang sa Kapitolyo wa hinuon modason sa pagbasol nilang Garcia ug Bolo. Gipanalipdan sa mga abogado sa Kapitolyo ang legalidad sa transaksiyon ug gimando ni Garcia ang pagpalambo sa luna. Maong kinabag-an sa mga botante sa Naga ug kasilinganang mga dapit nibasura nilang Garcia ug Bolo sa niaging piniliay.

* * *

Haskang daghanang naangin sa transaksiyon nilang Garcia ug Bolo: Ang mga sakop sa Provincial Board nga gipangulohan ni Bise Gobernador Greg Sanchez; ug mga pangu ug mga kawani sa mga departamento sa Kapitolyo. Nga, inay motuman sa ilang mga gimbuhaton, nitabang pagpalusot sa transaksiyon pinaagi sa paglingiw tungod sa pagtuo nga kang Garcia ang transaksiyon.

Hinaot nga panaminan ni sa hingtungdang mga opisyal ug mga kawani sa Kapitolyo. Ang ilang kahawod, ang makabungog nilang mayoriya sa provincial board, ang hingpit nilang pagkontrolar sa burukrasya sa Kapitolyo ug ang kamaayo nilang mopalusot og mga transaksiyon di na diay garantiya nga di sila masakpan. Nga ang nangalisbo nilang mga tinagoan di mabisto ni masilotan.

* * *

Email: [email protected]