Tagumpay na naman Pambansang Kamao
talagang sa lakas ay walang tumalo;
Matangkad mabigat si A. Margarito
sa suntok ni Paquiao halos bulag ito!
Kahi’t na matangkad ang kanyang kalaban
mukha ni Goliath abot din ni Pacman;
Bawa’t suntok nitong ating kababayan
katulong ang Diyos kaya nagtagumpay!
Kahanga-hanga pang itong bida
siya’y propesyonal at honest pa;
Sa huling dalawang round – alalay lang siya
sapagka’t kalaba’y alam n’yang talo na!
At itong si Pacquiao dahil madasalin
pati ang kaaway ay mahal n’ya pa rin;
Kahi’t ang kalaban kayang pabagsakin –
hindi n’ya ginawa at ayaw hiyain!
Dahil sa maingat sa kanyang paglaban
kanyang “body language” ay mapagmamasdan –
Hudyat ng referee ay inaabangan
hinihintay niyang itigil ng laban!
Lahat sanang boxer kahapon at ngayon
may diwa at puso ng tunay na kampeon;
Ang bawa’t panalo ay handog sa Poon
at sa ating baya’y dangal ang pabaon!
Sa mga tagumpay na iyong nakamit
kaisa mo kami sa lahat ng saglit;
Huwag masamain ang aming simple wish
sana’y palagi kang matapat umibig!
Mahalin mong lubos ang asawa’t anak
at ang ating bayang sandigan ang hanap;
Doon sa Kongreso’y dalhin ang watawat
upang ang korapsiyon ay maglahong ganap
Sa ngayon ay isang katulad mo lamang
ang makahahango sa dusa ng bayan;
Doon sa Kongreso ituloy ang laban
ikaw ang bayaning aming kailangan!