Nagpadungog-dungog na usab ang mga transport groups nga gusto na usab silang mopa-umento sa ilang minimum nga pletihan.
Wala baya mauwaw kining mga transport groups no? Ang ilang mga drayber dili man gani manukli sa pleti, bisan estudyante pa ka o senior citizen dili nila panumbalingon basta imong gibayad P7 ayaw nalang pagpaabot og sukli nga P.50.
Karon mangayo sila og dugang usbaw sa minimum fare? Hoy una mo mangayo og dugang pletihan tarunga una ninyo nang inyong pagpanukli. Klaro man nang inyo nga pagpangawat nga ‘harap-harapan’! Karon pabaga na usab mo sa inyong nawong?
Duna pa dihay uban nga mopaugat gyud bisan pa og pangayoan nimo sa imong sukli nga P.50 dili ka paminawon hangtud maabot nalang ka sa imong destinasyon.
Ang labing grabe, kanang singhagan ka sa drayber ug magbagulbol kay wala siya’y ikasukli sa P100 ug ingnon ka lang nga pabalhinon nalang sa laing sakyanan. Sus! Kung dili lang gyud langayan motubag sa mga reklamo kining Land Transportation and Franchising Regulatory Board magtipun-og man gyud ang reklamo batok niining mga drayber ba.
Matud pa sa mga balita, buot mangayo og umento sa pletihan ang Alyansa sa Nagkahiusang Drayber-Operator Alang sa Reporma (Andar) ug Cebu Integrated Transport Service Cooperative (Citrasco).
Ang rason nila nga misaka na usab kuno ang presyo sa produktong petrolyo ug misaka usab ang presyo sa mga piyesa sa sakyanan maong kinahanglang patas-an na gikan sa P6.50 nga minimum fare ngadto na sa P8.
Mura man og dili kini makiangayon! Tinuod misaka na ang presyo sa produktong petrolyo ug misaka usab ang presyo sa piyesa apan makapila ba ka higayon mius-os usab ang presyo niini?
Wala ba nila mamatikding atras-abante ra ang presyo sa lana karon? Kun padayon gyung nagsaka sa presyo sa lana siguro miabot na kini karon og P100 matag litro!
Pero tinuod adunay pagsaka nga naobserbahan. Duna say oil price decrease apan gamay lang gyud kumparar sa gidak-on sa pagsaka. Apan dili man siguro kada adlaw mag-ilis og piyesa ang mga sakyanan! Nganong apilon man na nila sa ilang mga rason?
Kung mao ni ang dagan sa atong transportasyon, hala mga kongresista ug local officials, mas maayo pang hingusgan ninyo ang inyong planong pagbutang og Bus Rapid Transit sa tanang rota sa Metro Cebu.
Dayon isunod ang pagbutang og Light Rail Transit (LRT) dili lang sa Metro Cebu kondili lahos-lahos sa ubang component cities sa probinsya aron menus traffic wala pa kaayoy polusyon gikan sa kagang-kagang natong mga jeepneys karon nga padayong nagbiyahe. Ini og mapatuman na ang BRT ug LRT atong panawagan ang atong LTFRB dinhi nga mopatuman na og moratorium sa pag-isyu og bag-ong prangkisa ug matag mosunod nga katuigan ang tanang prangkisa butangan og life span. Kinahanglang magamit lang sulod sa tulo ka tuig apan kinahanglang kada tuig i-renew kini apan pag-abot sa tulo ka tuig awtomatiko kining kanselado na.
Ibutang diha sa prangkisa asa nga sakyanan, chassis number ug engine number lang kini gamiton aron dili nila magamit sa ubang sakyanan ang maong dokumento.
Niining paagiha dili na maproblema ang atong mga drayber sa padayong pagsaka sa presyo sa lana ug piyesa hehehehehe.