EDITORYAL - Mayor Rama mawagtang sa mapa?

Migawas na usab ang mga kabalaka sa mga politiko sa Sugbo sa dakong kalagmitan nga mahisama na usab si Mayor Michael Rama sa gidangatan ni kanhi Mayor Alvin Garcia kinsa nawagtang na sa mapa sa politika sa dakbayan sa Sugbo.

Kini tungod sa nakita karong pagpanginlabot lang gihapon ni Kongresista Tomas Osmeña sa mga kalihokan ni Rama.

Gipakita ni Osmena nga siya lang gihapon ang may katungod nga mopadagan sa panggobyerno sa siyudad ug wala nay kaugalingong desisyon si Rama.

Ambot dili ba kaha sakit nga palandungon sa usa ka mayor kinsa luyo sa paningkamot nga mosaler ang iyang pagka-mayor gawngan lang gihapon siya sa iyang pangatungdanan aron santaon kun may kaugalingon siyang desisyon nga ipatuman.

Busa gumikan niining ka-walay pagsalig ni Osmeña sa estelo sa dinad-an ni Rama sa dakbayan sa Sugbo, manaog kini sa iyang pagka-kongresista ug mag-mayor na usab sa umaabot nga eleksyon.

Mao ba kaha kini mahitabo. Apan kun mao man, buot bang ipasabot nga napul-an dayon siya sa iyang pagka-kongresista?

Ah , kadali ba usab nga wala pa gani moinit ang sampot og liningkod sa kongreso, mobiya dayon siya human sa usa ka termino?

Daghang nangutana nga nagkanayon: kay ngano ba? Tungod ba kay dili siya mosaler didto sa kongreso kay dili siya ka-ek gumikan kay daghan pang maayong laki kay kaniya?”

Dinhi ra gayud siya diay mosaler sa dakbayan sa Sugbo? Samtang sa kongreso dili na, ngano man? Ambot lang kadaghan niining pangutanaha , si Kongresista Tom ra juy makatubag niini.