Ngano kaha no?

Nakadungog ko nga dunay pipila ka opisyal sa Land Transportation Office (LTO)-7 nga wala makagusto nga gitugotan pagbalik ni DOTC Assistant Secretary Virginia Torres ang mga sakop sa Task Force Alpha nga maka-operate pagbalik aron manakop sa mga masalaypong drayber.

Ngano kaha? Nagduda na ko niini da. Ngano kaha nga dili man sila gusto nga dunay motabang sa pagpanakop sa mga makahimo’g kalapasan sa mga lagda nga gilatid sa Transportation and Traffic Code?

Tungod ba kay mahadlok kamo nga posibleng maapektahan ang inyong mga giprotektahan? Nakadungog man gud ko nga dunay mga opisyal sa LTO nga kusog kaayong molaban kun dunay mga kompaniya sa taksi nga maigo sa operation.

Daghan man gud nga mga kompaniya sa taksi nga mamalit lang og mga makina nga gikan sa surplus dealers, bisan og kini gipalusot ra nga walay bayad nga buhis sa Bureau of Customs.

Unya, kun maguba ang ilang makina sa taksi, deritso lang nila nga ilisan ang mga makina niadtong gipalit nila nga makina nga gipalusot sa mga surplus dealers.

Atul sa checkpoint operations sa Task Force Alpha sa miaging katuigan, daghang mga taksi ang nasakpan sa maong binuang. Gitug-anan ko sa mga sakop sa TFA nga dunay mga opisyal nga mohangyo nga hunongon na ang paghimo sa maong kampanya.

Aw, klaro na kaayo kun nganong pugngan man ninyo ang TFA sa paghimo sa maong operation. Awhagon nako ang kadagkoan sa LTO nga ayaw ninyo itugot nga kini magpadayon.

Pwerteng sukoa ni assistant director Edgar Catarungan nga nasayud niining maong binuang.

Tan-awon nato kay gipasalig g’yud ni Catarungan nga himoan niya’g aksyon kining maong binuang. Ayaw ninyo pugngi ang mga sakop sa TFA gawas lang kun nakahimo sila’g sayop.

Pananglit kining paghimo nako og lindog nga mosaway sa mga dili maayong binuhatan sa LTO isipon ninyo nga sayop, katungod ninyo ang pagkanselar sa akong deputation.

* * *

Husto ang baruganan sa akong higala nga kadtong mga tawo nga itudlo nga modumala sa LTO mao gayud kadtong mga buotan ug dili mga kiriwan.

Kadtong mga tawo nga maantigo mobantay, ilabi na ang mga “dos por dos” nga binuang diin ang bayad sa mga magbubuhis tuyoon nila nga pagamyon diha sa resibo nga mahabilin sa file. Sama pananglit nga sa usa ka transaksyon mobayad ang usa ka magbubuhis og P5,000 nga rehestro sa trak, aw ang resulta didto sa kopya sa resibo nga ibilin diha sa LTO, mahimo na kana nga motor nga ang bayad P139.

Ingon niini ang sitwasyon nga nasakpan kaniadto sa kadagkoan sa Commission on Audit (COA) kaniadto. Basta kay ang mga walay uwaw nga cashier kaniadto sa LTO makabulsa g’yud og labing minus tag P30,000 ngadto sa P50,000 ang adlaw.

Ang angay’ng ibutang diha mao kadtong mga mahadlokon sa Ginoo. Apil na diha sa LTFRB, kinahanglan nga ang idistino nga regional direktor buotan ug dili makamao mangwarta. Apan mao lagi, sama ni LTFRB-7 regional director Benjamin Go nga maayo kaayo nga mokampanya sa binuang, gusto man usab sa uban nga mapapahawa dinhi.

Karon hinoon nga may inbentaryo na nga gihimo ang taga DOTC-Manila, mahibaw-an na g’yud ang binuang. Hinoon, gusto sa audit team gikan sa Manila nga tingbon ang pagpahibawo sa ilang findings.