Gipangutana sa usa ka dumuduong ang usa ka balaang ermitanyo: “Kun hatagan ka na lang sa Ginoo og usa ka adlaw dinhi sa kalibutan, unsa may imong buhaton?” Ang ermitanyo mitubag: “Tingali, mohimo ko sa akong pag-ampo sa kabuntagon dayon manglimpiyo ko sa akong hardin, dayon akong duawon ang akong higala nga si Juan, o dili ba kaha matulog.” Ang dumuduong misakgaw: “Yuna ra, dili ba ordinaryo naman nimo ning buhaton matag adlaw?” Ang ermitanyo mitubag: “Bitaw kay ngano man diay unsa may kalainan sa maong adlaw ug sa laing mga adlaw?”
Pagpalawom
Walay kumo sa pagbaton og mataganaong birtud. Ang kamatayon butang nga dili angay’ng kahadlokan, isipa na lang nga ang pagpangandam sa maong hitabo ordinaryo lamang kaayo sama sa laing mga adlaw sa atong pagkinabuhi. Kay kun susihon nato ang kalibutang lumalabay dili maoy atong puloy-anang tunhay. Hugot ang atong pagtuo nga adunay kabanhawan diin kitang mga tawo ang makabaton og bag-ong tipo sa pagkinabuhi. Kini ang kinabuhi sa kahimayaan. Ang mga Saduseo hugtanon nga wala motuo nga dunay kabanhawan. Ginamit ang sanglitanan sa Levirate Marriage diin obligasyong moral sa igsuon o sa ig-agaw (first degree) ang pagpangasawa sa biyuda kang kansang bana namatay nga walay anak. Tumong niini nga makapanganak sila sa ngalan sa namatay aron ang pangalan niini ang dili mapapas sa listahan sa ilang banay. Ang mga Saduseo ang naghunahuna sa karon ug nahimong wala sa ilang panlantaw ang umaabot. Apan ang Ginoo mipahimug-at sa tinud-anay nga kahulogan sa pagkabanhaw.
Ang pagkabanhaw dili lang pag-uli sa gininhawa sa patay’ng lawas hinunoa, kinabuhi kini nga mahimayaon nga maoy atong pagadangatan inig-abot sa tukmang panahon nga gilatid sa Dios alang kanato.
Implikasyon niini sa atong inadlaw ug Kristohanong pagkinabuhi
Gipahimugso kita aron mamatay. Mao nga paningkamotan nato nga pagapuy-an ang kinabuhi diha sa tumang kasibot nga makabuhat og maayo. Kay dili mangita ang Dios sa atong napundar, hinunoa, ang Dios mangita’g husay sa atong gipanghimo niining kalibutan. We are meant for greater things matud pa nila. Ang nakapahimo sa kabanhawan nga usa ka interesanteng pangandoy mao nga sa mas suod ug sa mas personal nga paagi, atong makita ang Dios sa mga buhi ug dili sa mga patay. Si Kristo namatay, si Kristo nabanhaw, si Kristo mobalik nganhi.