“WE continue to receive credible reports indicating terrorists are planning attacks against a range of targets, including places frequented by foreigners ... Reliable reports indicate that terrorist attacks may be imminent in Manila.” Australian Travel Advisory. “Terrorist attacks could be indiscriminate and could occur not only in the southern islands but also in other areas, to include Manila.” Travel Warning ng America at Inglatera. Maging ang pagsakay sa mga eroplanong Pilipino ay itinuring na delikado.
Dahil sa naunsiyaming pagbomba sa mga cargo plane ng America at Inglatera, tila buong mundo na ang napapraning. Isa na ang Pilipinas sa matatawag na collateral damage ng pangyayari. Hindi pa man tayo nakakabangon sa dagok ng Luneta hostage crisis ay heto’t may bago tayong hamon na haharapin.
Hindi kagulat-gulat na tayo’y kasama sa unang mga bansang katatakutan ng mga Puti. Dahil sa mahabang kasaysayan ng giyera sa Mindanao, at sa namayaning karahasan itong mga nakalipas na taon na isinisisi sa alitan, sino pa ba ang paghihinalaan na pugad ng terorismo? Lalo na sa mga Amerikano na hindi malimutan ang koneksyon ng Pilipinas sa mga teroristang nasabat sa pagbobomba sa 9/11 at sa mga turista nila sa Indonesia.
Agad siyempreng pinabulaanan ng AFP at ng PNP ang intelligence reports ng ating mga kaalyadong bansa. Kahanga-hanga ang kanilang pagkilos upang huminahon ang lahat. Ayos pa rin daw ang seguridad ng turista sa Pilipinas.
Bilang Pinoy nais ko ring maniwala na hindi naging war zone bigla ang aking tirahan. Para sa ating mga anak, mahalagang manatiling panatag ang loob – walang maitutulong ang pag-panic. Subalit hindi mawawala ang pag-alala. Medyo ang mga lider lang naman ng mundo sa kagalingan ng intelligence gathering ang nagsabing may credible reports ng terorismo. Sino kaya sa kanila at sa sarili nating intelligence agency ang nakapagbibigay kumpiyansa?
Utang sa atin ng pamahalaan ang imbestigahan ng mahusay, na binibigyan ng kaukulang timbang, ang paratang ng mga Puti. At sana’y sa lalong madaling panahon ay maipamahagi sa lahat ang katotohanan nang mapaghandaan ito ng mabuti. Mas maganda ang may liwanag kaysa lahat tayo nasa dilim.