Labaw pang Joavan

Way nakahunghong ni Joavan Fernandez nga kay bisperas na sa kalag-kalag, alerto ang kapolisan sa Talisay. Nga samtang mga minteryo ang sentro sa ilang pagbantay, andam sang kapolisan sa pagtubag sa uban pang mga alarma. Bisan kun si Joavan pa ang gipasanginlan nga nagpasiugda. Ug labi na kun ang mga polis maoy nangangkon nga mga biktima.

Hinaot wa pa ka pul-i nga nagbasa sa way kinutoban nga litaniya sa mga salida sa sinagop ni Talisay City Mayor Soc Fernandez. Siya na say gipasanginlan nga nituyo pagbangga sa sakyanan sa kapolisan. Nasakmit tuod ang iyang sakyanan apan, nakatag-an ka, wa na sab madakpi si Joavan.

* * *

Nagpakabana nga mga molupyo sa Talisay, nga gikapoy na sa mga pakauwaw ni Joavan, nipasangil na gani sa ilang mga polis nga talawan sa paggukod sa anak sa mayor. Kun wa man makigkonsabo sa iyang amahan pagpaikyas na sab, sa makausa pa, ni Joavan.

Apan lisod tuohan nga nitalaw ang kapolisan. Mas katuohan nga inutil sila, ug ang ilang gisandigan nga balaod, batok ni Joavan ug sa iyang amahan. Naabtan og mga polis ug tulo ka oras una natultolan ang sakyanan ni Joavan. Naabtan sila og laing usa ka oras una nakuha ang sakyanan. Apan kinahanglan una nga magpalaban sa pribadong towing company sa Dakbayan sa Sugbo.

* * *

Kun tuohan ang tulo ka polis sa Talisay, nga nangangkon nga nabungog sila kadiyot sa kakalit ug sa kakusog sa pagbangga sa Pajero ni Joavan nga nakapawong sa makina sa ilang patrol car nga Innova, wa na maghasol si Joavan pagtago sa iyang nawong. Kay gipasagdang abli ang bintana sa iyang sakyanan ug gipabantang ang iyang dagway sa nakugang nga kapolisan, sa wa pa mopasutoy palayo.

Dihang natultolan nang sakyanan sa pinuy-anan ni Joavan sa Mansueto Subdivision sa Bulacao, Talisay, nagdumili ang nagpailang asawa ni Joavan sa paghatag sa yawe sa Pajero. Taudtaod, niabot si Mayor Fernandez nga niangkong gitawgan ni Joavan. Nihatag man tuod sa yawe apan nikalit lang og kalimot sa nahimutangan sa iyang paboritong sinagop.

* * *

Ang pagdupadupa sa mayor mahimong maoy nakapasamot sa kaabusado ni Joavan. Maayo na lang kay madutlan pa man og mga kaso, bisan kun sa kapulihay maareglo ra gihapon. Kay hawod tuod ang mayor sa Talisay apan wa nay mahimo paggawong sa mga piskal ug mga huwes.

Palandonga unsa kadako ang tentasyon sa mga mayor ug mga gobernador nga nanghatag og dagkong allowances sa mga piskal ug mga huwes. May mga kaso pa bang makadut nila? Unsa kaha intawoy uk-ok nga mosud sa ilang mga bakukang sa pagpahimus sa sitwasyon nga bisan kinsang mangahas pagkiha nila, o si bisan kinsang demalas nga ilang ikiha, way bisan gamay’ng dag-anan?

* * *

Email: [email protected].